Qazaqstanda 140 myńnan astam jol belgisi tekseriledi
ASTANA. KAZINFORM — Qazaqstanda jol qozǵalysy qaýipsizdigin arttyrýǵa jáne jol ınfraqurylymy elementterin normatıvtik talaptarǵa sáıkestendirýge baǵyttalǵan jol belgileri aılyǵy bastaldy. Bul týraly Kólik mınıstrligi málim etti.
— Aılyq aıasynda jol qyzmetteri, atap aıtqanda Jol aktıvteri sapasynyń ulttyq ortalyǵy respýblıkalyq mańyzy bar avtomobıl joldarynda ornatylǵan barlyq jol belgilerine keshendi tekserý júrgizedi. Erekshe nazar olardyń durys ornalastyrylýyna, tehnıkalyq jaı-kúıine, kóriný deńgeıine, sondaı-aq qoldanystaǵy jol qozǵalysyn uıymdastyrý shemasyna sáıkestigine erekshe nazar aýdarylady, — dep habarlady vedomstvodan.
Sonymen qatar jóndeý jumystary júrgizilgen jol ýchaskeleri bólek tekseriledi. Ol jerlerde jyldamdyqty shekteıtin belgilerdi qosa alǵanda, ýaqytsha nemese eskirgen belgiler saqtalyp qalýy múmkin. Sáıkessizdikter anyqtalǵan jaǵdaıda mundaı belgiler alynyp tastalady nemese ózekti belgilermen aýystyrylady.
Sondaı-aq, tekserý sheńberinde jol belgileriniń qarańǵy ýaqytta kórinýi, jaryq shaǵyldyratyn elementterdiń bolýy, sondaı-aq jol jaǵdaılaryn eskere otyryp, olardyń durys ornatylýy baǵalanatyn bolady.
— Jalpy, respýblıkalyq mańyzy bar joldarda 140 myńǵa jýyq jol belgisi ornatylǵan. Jol qaýipsizdigi jónindegi keshendi nysanaly baǵdarlama aıasynda jyl saıyn 10 myńǵa jýyq belgi jańartylady. Máselen, 2021 jyly — 11,4 myń, 2022 jyly — 10,6 myń, 2023 jyly — 10,7 myń, 2024 jyly — 11,2 myń, al 2025 jyly — 10,6 myń belgi ornatyldy. Bıylǵy jyly shamamen 8 myń jol belgisin ornatý jáne aýystyrý josparlanǵan, — delingen habarlamada.
Bul shara respýblıkalyq mańyzy bar avtomobıl joldaryndaǵy jol belgileriniń jaı-kúıin júıeli túrde tekserýge jáne jol qozǵalysyna qatysýshylardyń qaýipsizdik deńgeıin arttyrýǵa múmkindik beredi.
Eske sala keteıik, buǵan deıin biz jol qurylysyna qoıylatyn talap kúsheıgenin jazdyq.
