Qazaqstanda 140 myńnan astam turaqty qan donory bar
ASTANA. KAZINFORM — Qazaqstanda sońǵy on jylda 140 myńnan astam turaqty qan donory tirkeldi. Mamandardyń aıtýynsha, dál osy azamattar eldegi qaýipsiz qan qoryn tolyqtyrýda mańyzdy ról atqarady. Bul týraly Transfýzıologııa ǵylymı-óndiristik ortalyǵy Kazinform agenttiginiń resmı saýalyna bergen jaýabynda málim boldy.
Ortalyqtyń Qoǵammen baılanys jáne yntymaqtastyq bóliminiń basshysy Alma Demeýovanyń dereginshe, 2016 jyldan 2026 jyldyń maýsymyna deıin elimizde 684 474 adam alǵash ret donor bolǵan. Al osy kezeńde 140 350 turaqty donor tirkelgen.
— Turaqty donorlar — sońǵy 12 aı ishinde úsh jáne odan da kóp ret qan nemese onyń komponentterin tapsyrǵan azamattar. Dál osy sanattaǵy donorlar qan qyzmetiniń turaqtylyǵyn qamtamasyz etip, patsıentterdiń qajettilikterin úzdiksiz óteýge mańyzdy úles qosady, — dedi ol.
Onyń sózinshe, qan ortalyqtarynyń basty mindetteriniń biri — alǵashqy donorlardy turaqty donorlar qataryna tartý.
— Sol úshin qan ortalyqtary azamattarmen turaqty baılanys ornatyp, olardy qaıta donor bolýǵa shaqyrady, aqparattyq aktsııalar ótkizip, óteýsiz donorlyq mádenıetti nasıhattaıdy, — dedi bólim basshysy.
Mamannyń aıtýynsha, alǵashqy jáne turaqty donorlar sanynyń artýy eldegi qaýipsiz qan qoryn qalyptastyrýǵa jáne medıtsınalyq uıymdardy qan komponentterimen úzdiksiz qamtamasyz etýge múmkindik beredi.
Eske salaıyq, buǵan deıin Qazaqstan Úkimetiniń qaýlysymen qan donorlary úshin alǵash ret resmı túrde «Qurmetti donor» marapaty taǵaıyndalǵanyn habarlaǵanbyz.
