Qazaqstanda 14 jyldyń ishinde 330 myńnan astam medıtsına qyzmetkeri biliktiligin arttyrǵan

ASTANA. QazAqparat - 2002-2015 jyldar aralyǵynda Qazaqstanda biliktilikti arttyrý jáne qaıta daıarlaý kýrstarynda densaýlyq saqtaý salasynyń 330 466 mamany (2002 jyly - 9 500, 2015 jyly - 47 512), onyń ishinde 2 572 adam shetelde oqytyldy.

QR DSÁDM-de málimdegendeı, mamandardy shetelde daıarlaý 2005 jyly bastaldy. Osy ýaqyt aralyǵynda qazaqstandyq mamandar dıagnostıkalaýdyń jańa ádisteri men kardıohırýrgııa, neırohırýrgııa, onkologııa, gematologııa, akýsherlik jáne gınekologııa, pedıatrııa, ftızıatrııadaǵy jáne t.b. jańa emdeý tásilderin úırendi.

Densaýlyq saqtaý júıesinde jyldan jylǵa jańa tehnologııalar engizilip, jańa dárilik zattar men jabdyqtar jasalýda. Sondyqtan, mamandardy oqytý sapasyna, onyń ishinde qosymsha bilim berý baǵdarlamalaryna degen talap artyp keledi.

Mamandardy kásibı turǵyda úzdiksiz damytý múmkindigin qamtamasyz etý maqsatynda QR DSÁDM birqatar keshendi sharalardy qarastyrýda. Jyl saıyn respýblıkalyq bıýdjetten densaýlyq saqtaý salasy uıymdarynyń kadrlaryn qaıta daıarlaý men olardyń biliktiligin el ishinde arttyrýǵa; memlekettik densaýlyq saqtaý salasy uıymdarynyń kadrlaryn qaıta daıarlaý men olardyń biliktiligin arttyrý sharalaryn sheteldiń jetekshi mamandaryn shaqyrý arqyly otandyq bilim jáne ǵylym uıymdarynda ótkizýge, sonymen birge, joǵary bilimdi jáne JOO-dan keıingi bilimi bar mamandardy daıarlaýǵa qarajat bólingen.

Sonymen qatar, JOO-dan keıingi bilim berý baǵdarlamasynyń aıasynda joǵary mamandandyrylǵan kadrlardy rezıdentýra, magıstratýra men doktorantýrada daıyndaý júrgizilýde.

Jańa format mamandaryn - densaýlyq saqtaý salasy magıstrlerin daıyndaý 2003 jyldan beri júzege asyrylyp keledi.

Qazaqstannyń Bolon konventsııasyna qol qoıýy aıasynda 2008 jyldan bastap Phd doktorantýrasy men rezıdentýrasynda daıarlaý júrgizilip keledi. Osy jyldar aralyǵynda 2 myńnan astam joǵary mamandandyrylǵan ǵylymı kadrlar daıarlandy.

Esterińizge sala keteıik, 2013 jyldan bastap QR densaýlyq saqtaý salasy kadrlarynyń resýrstaryn damytýdyń keshendi jospary júzege asyrylyp keledi. Onyń maqsaty - densaýlyq saqtaý salasynyń sapaly qyzmetterin qamtamasyz etetin tıimdi kadrlyq saıasatyn qalyptastyrý. Ol birqatar sharalar keshenin, sonyń ishinde kadrlardy úzdiksiz kásibı damytý ádistemesin qarastyrady. Mamandardy dıplomnan keıin daıyndaýdy jetildirý boıynsha qabyldanatyn sharalar mamandardyń biliktiligin arttyryp, halyqqa kórsetiletin medıtsınalyq kómektiń sapasyn ulǵaıtýǵa múmkindik beredi.