Qazaqstanda 13,5 myńnan astam shetel azamaty zańdy jumys istep júr
ASTANA. KAZINFORM – 2024 jylǵy 1 sáýirdegi jaǵdaı boıynsha jergilikti atqarýshy organdardyń ruqsatymen Qazaqstan aýmaǵynda 13 536 shetel azamaty eńbek etedi. Bul týraly Eńbek jáne halyqty áleýmettik qorǵaý mınıstrliginiń baspasóz qyzmeti málimdedi.
«Shetel jumys kúshin tartýǵa ruqsattardyń arasynda mynadaı sanattar bar: basshylar men olardyń orynbasarlary úshin 605 ruqsat (birinshi sanat), qurylymdyq bólimshelerdiń basshylary úshin 2 793 ruqsat (ekinshi sanat). Tartylǵan shetel jumys kúshiniń negizgi bóligi úshinshi (mamandar) jáne tórtinshi (bilikti jumysshylar) sanattarǵa jatady — tıisinshe olar 5 914 jáne 570 adam. Sondaı-aq maýsymdyq jumystarǵa 2 458 adam, al korporatıvtik aýystyrý aıasynda 1 196 adam tartyldy», - delingen habarlamada.
Vedomstvonyń málimetinshe, qazirgi ýaqytta Qazaqstanda ShJK paıdalanatyn 1 728 jumys berýshi bar. Olarda 459 myńnan astam Qazaqstan azamaty jumys isteıdi, bul qyzmetkerlerdiń jalpy sanynyń 99,2% — y.
Ekonomıkalyq qyzmet túrleri boıynsha eń kóp jumys isteıtinder qurylys salasynda — 4 297 adam (31,7%), ákimshilik jáne kómekshi qyzmetter — 1 629 (12%), aýyl, orman jáne balyq sharýashylyǵy — 1 482 adam (10,9%), taý — ken ónerkásibi jáne karerlerdi qazý — 1 285 adam (9,4%), óńdeý ónerkásibi — 1 248 adam (9,2%), kásibı, ǵylymı jáne tehnıkalyq qyzmet — 797 adam (5,9%).
Eńbek mıgranttary keletin negizgi elder: Qytaı — 4 011 adam (29,6%), Ózbekstan — 1 577 adam (11,6%), Úndistan — 1 187 adam (8,7%), Túrkııa — 1 058 adam (7,8%).
Іshki eńbek naryǵyn qorǵaý maqsatynda QR Eńbek jáne halyqty áleýmettik qorǵaý mınıstrligi jyl saıyn respýblıkaǵa shetel mamandaryn tartýǵa kvota belgileıdi jáne bóledi. 2024 jyly jalpy kvota respýblıkadaǵy jumys kúshiniń sanyna qatysty 0,23% nemese 22 myń birlik mólsherinde belgilendi.
