Qazaqstanda 134 erkek «dekrette» bolǵan
ASTANA. 16 aqpan. QazAqparat - Elimizdegi memlekettik saqtandyrý qorynyń prezıdenti Almas Qurmanovtyń aıtýynsha, sońǵy bes jylda Qazaqstanda 134 jigit kezekten tys «dekrettik» demalysqa shyqqan.
Mamannyń sózine qaraǵanda, kelinshegi bosanǵan soń onyń ornyna kúıeýi jumysynan demalys alyp, balamen úıinde otyrýyna bolady. Bul tipti sheshilmeıtin másele emes jáne kásiporyn nemese mekeme basshylary da daýlaspaýy kerek. Zańnyń aty - zań, dep jazady «Aıqyn» gazeti búgingi sanynda.
Jasyratyny joq, mundaı jaǵdaı óte sırek kezdesetin qubylys. Alaıda bala baǵýdy uıǵarǵan jigitterdiń jolyna bóget bolmaý kerek. Áıeli jalaqysy joǵary jerde jumys isteıtin erlerdiń bir bóligi osy joldy tańdaıdy eken. Bir qaraǵanda, bul da jaqsy qubylys. Áıtpese shaqalaqtaryn bala baǵýshylarǵa qaldyryp, qyzmet qýyp ketetinder qanshama?!
Bala kútimi úshin aılyq áleýmettik tólem náreste bir jasqa tolǵansha, erkektiń jumys ornynan tólenedi. Ol da jalaqyǵa tikeleı baılanysty. Demek, bala kútemin degen jigitterge jol ashyq.
