Qazaqstanda 12,7 mln tonna astyq bastyryldy

ASTANA. KAZINFORM — Egin jınaý naýqany uıymdasqan túrde, agrotehnıkalyq talaptarǵa saı merzimde ótip jatyr, dep habarlaıdy AShM baspasóz qyzmeti.

Elimizdiń óńirlerinde egin jınaý naýqany jalǵasyp jatyr. Dándi jáne dándi-burshaqty daqyldardyń boljamdy jınaý alańy 16 mln gektardan asady.

— Búgingi tańda 8,4 mln gektar nemese jalpy egis alqaptarynyń 52,6%-y jınaldy. Nátıjesinde 12,7 mln tonna astyq bastyryldy. Dándi daqyldardan bólek, aýyl sharýashylyǵy taýaryn óndirýshiler 435 myń tonna maıly daqyl, gektaryna 224,3 tsentner ónimdilikpen 1,5 mln tonna kartop jáne gektaryna 284,5 tsentner ónimdilikpen shamamen 2,5 mln tonna kókónis jınady. Atap aıtqanda, 330,1 ts/ga ónimdilikpen 396 myń tonnadan astam qyryqqabat, 423,3 ts/ga ónimdilikpen 676,7 myń tonna pııaz, sondaı-aq 296,6 ts/ga ónimdilikpen 241,2 myń tonna sábiz jınaldy, — delingen mınıstrlik habarlamasynda.

Budan buryn Memleket basshysy Aqmola oblysyndaǵy egin jınaý naýqanymen tanysqanyn jazǵanbyz. Prezıdentke bıyl óńirdegi egis alqabynyń kólemi 300 myń gektarǵa ulǵaıyp, 5,5 mıllıon gektarǵa jetkeni baıandaldy.