Qazaqstanda 124 vokzal jańǵyrtylyp jatyr: 1 shildege deıin 30 nysan ashylady
ASTANA. KAZINFORM – Qazaqstannyń 124 vokzaly jańǵyrtýdan ótip, jańadan salynyp jatyr. Qazir Kókshetaý, Býrabaı kýrorty, Qonaev, Kóktýma, Aqshı, Mankent, jáne Balqash-2 vokzaldarynda jumystar aıaqtaldy.
Kólik mınıstri Nurlan Saýranbaevtyń aıtýynsha, 1 shildege deıin 30 vokzal paıdalanýǵa beriledi.
– Sonymen qatar jolaýshylar vagondary jańartylyp jatyr. Byltyr 175 jańa vagon satyp alyndy. Bıyl taǵy 191 vagon alý josparlanýda. 2030 jylǵa deıin jolaýshylar vagondarynyń 90 paıyzy jańartylady. Bul negizgi týrıstik baǵyttardy tolyq qamtýǵa múmkindik beredi, - dedi Kólik mınıstri búgingi Úkimet otyrysynda.
Aıta keteıik, Qazaqstannyń týrıstik oryndaryna aparatyn joldar jóndeýden ótip jatyr. Bıyl Almaty-Óskemen jolyndaǵy jumystar aıaqtalyp, jol júrý ýaqyty 4 saǵatqa qysqarǵan.
