Elimizde 40 jyl boıy jóndeýden ótpegen vokzaldar jańa kelbetke ıe bolady
ASTANA. KAZINFORM — Qazaqstanda temirjol vokzaldaryn jańǵyrtý boıynsha aýqymdy baǵdarlama júzege asyrylyp jatyr, dep habarlaıdy Kólik mınıstrliginiń baspasóz qyzmeti.
Osy joba aıasynda oblys ortalyqtarynda, shaǵyn qalalar men eldi mekenderde ornalasqan 124 vokzal bir ýaqytta jańartylyp jatyr. Olardyń kópshiligi keńes dáýirine deıin nemese keńestik kezeńde salynǵan jáne sońǵy 30–40 jylda kúrdeli jóndeýden ótpegen.
Tehnıkalyq tekserý nátıjesinde keıbir vokzaldar apatty dep tanyldy. Mundaı ǵımarattar buzylyp, olardyń ornyna zamanaýı jańa vokzal keshenderi salynyp jatyr. Baǵdarlama aıasynda vokzal aýmaqtary keńeıtilip, ınjenerlik júıeler jańartylady.
Sondaı-aq qasbetter men ishki kórinis, kútý zaldary men jolaýshylar platformalary jóndeledi. Sanıtarlyq jaǵdaı men qaýipsizdik deńgeıi de jaqsartylady.
— Jobany iske asyrý vokzaldardyń ótkizý qabiletin arttyryp, kólik qyzmetiniń sapasyn jaqsartýǵa jáne qozǵalysy shekteýli azamattar úshin qoljetimdi orta qalyptastyrýǵa múmkindik beredi. Jóndeý jumystaryn oblystyq ákimdikter tańdaǵan merdiger uıymdar júrgizedi. Qarjylandyrý «Qazaqstan temir joly» UK» AQ qarajaty esebinen júzege asyrylady, — delingen mınıstrlik habarlamasynda.
Qaıta jańǵyrtý aıaqtalǵannan keıin jolaýshylar zamanaýı kútý zaldaryn, jańartylǵan aqparattyq jáne navıgatsııalyq júıelerdi, sondaı-aq barlyq azamattarǵa qolaıly jaǵdaılardy paıdalana alady. Baǵdarlamanyń basty maqsaty — Qazaqstannyń temirjol ınfraqurylymyn qazirgi zamanǵy jáne halyqaralyq sapa men qaýipsizdik standarttaryna saı etý.
Budan buryn jolaýshylar shaǵymynan keıin Aqtóbe — Mańǵystaý poıyzynyń vagondary jańartylǵany anyqtaldy.