Qazaqstanda 122 myńnan astam múgedek ońaltýdyń tehnıkalyq jabdyqtarymen qamtamasyz etildi - QR DSÁDM
«2015 jyly ońaltýdyń tehnıkalyq jabdyqtarymen 122 myńnan astam múmkindigi shekteýli azamattar qamtamasyz etildi», -delingen vedomstvo habarlamasynda.
Túsindirip ótkendeı, onyń ishinde shalǵaı eldi-mekenderde turatyn 4 myńǵa jýyq adamǵa ońaltý jabdyqtary «Qazposhta» AQ qyzmetteri arqyly úılerine jetkizildi.
Vedomstvonyń málimetinshe, ótken jyldan beri Qazaqstanda alǵash ret 300-den astam balalarǵa bıýdjet qarajatynyń esebinen kohlearly ımplanttardyń sóıleý protsessorlary aýystyrylyp, kúıge keltirildi. Sonymen birge, 2015 jyldan bastap estý qabileti buzylǵan 370 balaǵa kohlearly ımplantatsııa otasynan keıingi estý qabiletin ońaltý sharalary jalǵasyp keledi.
«Múgedekterdi ońaltýdy tehnıkalyq jabdyqtarymen qamtamasyz etý - olardy qoǵamǵa beıimdeýdiń basty tetigi bolyp tabylady. 2015 jyly QR Densaýlyq saqtaý jáne áleýmettik damý mınıstrligi múgedekterdi ońaltý tehnıkalyq jabdyqtarynyń tizimin jańartý boıynsha jumys júrgizdi. Múmkindigi shekteýli adamdarǵa arnalǵan mindetti gıgıenalyq jabdyqtardyń normalary ulǵaıtyldy», - dep basa aıtty mınıstrlikte.
Aǵymdaǵy jyly QR DSÁDM múgedekterdiń quqyqtaryn qamtamasyz etý jáne ómir súrý sapasyn jaqsartý jónindegi 2012-2018 jyldarǵa arnalǵan is-sharalar josparynyń úshinshi kezeńin júzege asyrý sharalaryn jalǵastyrady. Atap aıtqanda, bul jospar halyqtyń jas erekshelikterine qaraı múgedektikti eskertý men aldyn alýdy, medıtsınalyq-áleýmettik saraptama men densaýlyq saqtaý qyzmetterin biriktirýdi qamtamasyz etýdi, jyl saıynǵy eńbekke jaramdy turǵyndardy profılaktıkalyq tekserýdi qarastyrady.
Budan ózge, josparda múgedek balalarǵa arnalǵan bilim berý baǵdarlamalary men standarttaryn qaıta qarastyrý arqyly ınklıýzıvti bilim berýdi damytý, estý jáne kórý qabileti buzylǵan balalardy kezeń-kezeńimen oqýlyqtarmen qamtamasyz etý, ınklıýzıvti jáne arnaıy bilim berý salasy qyzmetkerleriniń biliktiligin arttyrýǵa arnalǵan memlekettik tapsyrysty ulǵaıtý, múgedekterdi oqytýǵa arnalǵan kvotalardy belgileý úshin mamandyqtar tizimin qaıta qaraý qarastyrylǵan.
Esterińizge sala keteıik, 2015 jylǵy 20 aqpanda Memleket basshysy «Múgedekterdiń quqyǵy týraly Konventsııany ratıfıkatsııalaý týraly» QR Zańyna qol qoıdy. QR Úkimeti múgedekterdiń quqyqtaryn qamtamasyz etý jáne ómir súrý sapasyn jaqsartý jónindegi 2012-2018 jyldarǵa arnalǵan is-sharalar josparyn bekitip, ony kezeń-kezeńimen júzege asyrýda.
Qazirgi tańda elimizde 627 myńǵa jýyq múmkindigi shekteýli azamattar bar.