Qazaqstanda 1200 sheneýnik memlekettik qyzmette jumys isteı almaıdy
ASTANA. QazAqparat - Qazaqstanda 1200-den astam burynǵy sheneýnik memlekettik qyzmetten ómir boıyna shettetildi. Bul týraly búgin Astanada EYDU sybaılas jemqorlyqqa qarsy jelisi quqyq qorǵaý organdarynyń jetinshi otyrysynda QR Memlekettik qyzmet isteri jáne sybaılas jemqorlyqqa qarsy is-qımyl agenttigi tóraǵasynyń orynbasary Alık Shpekbaev málim etti, dep habarlaıdy QazAqparat.
«660 laýazymdy tulǵa eselik aıyppuldarǵa tartyldy. Tek eki jylda osyndaı aıyppuldarda eselep tóletýden bıýdjetke 6 mlrd. teńge tústi. Sybaılas jemqorlyqqa jol bergeni úshin 924 adamǵa qatysty múliktik tárkileý jazasy qoldanyldy jáne 1200-i memlekettik qyzmette jumys isteýden ómir boıyna shettetildi»,-dedi Shpekbaev.
Sonymen qatar zańnamany izgilendirý nátıjesinde Qazaqstan dúnıejúzilik túrme reıtınginde ońtaıly kórsetkishterge qol jetkizdi.
«1996 jyly Qazaqstan túrmede otyrǵandardyń sany boıynsha AQSh pen Reseıden keıin úshinshi orynda boldy. 20 jyldan astam ýaqyt ótip, osy rette quqyqtyq júıege engizilgen ózgeristerge baılanysty Qazaqstan 3-ten 62-shi orynǵa ornalasty»,-dedi agenttik basshysynyń orynbasary.
Onyń sózine qaraǵanda, osy jyldary AQSh ekinshi orynǵa jyljysa, RF tek onynshy orynǵa joǵarylady. Bul óz kezeginde Qazaqstanda mańyzdy quqyqtyq reformalar júrgendigin baıqatady.
Aıta keteıik, búgingi otyrysqa álemniń 24 elinen 50-den astam sheteldik delegatsııalardyń ókilderi qatysýda.
