Qazaqstanda 12 myńnan astam adam túrmeden bosap shyqty
ASTANA. QazAqparat - Qazaqstanda 2018 jyly 12 myńnan astam adam túrmeden bosap shyqty, dep habarlaıdy QazAqparat tilshisi QR Іshki ister mınıstrligi Qylmystyq-atqarý júıesi komıtetiniń baspasóz qyzmetine silteme jasap.
Atap ótilgendeı, Qazaqstanda sońǵy jyldary qylmystyq-atqarý júıesin izgilendirýge baǵyttalǵan birqatar quqyqtyq norma qabyldandy. Maqsat - sottalǵandardy erterek bosatýǵa múmkindik berý.
«2018 jyldyń 12 aıynyń ishinde penıtentsıarlyq júıe mekemelerinen 12 myńǵa jýyq adam bosatyldy. Onyń ishinde, eki myńnan astamynda jazany óteý merzimi aıaqtalǵan. Al qalǵany - merziminen buryn shartty túrde bosatyldy, jeńildetilgen jaza túrine aýystyryldy nemese basqa aspektilerge ıe boldy», - delingen komıtettiń habarlamasynda.
Bul rette, arnaıy kontıngentpen QR Prezıdentiniń Jarlyǵymen bekitilgen Túrmeden bosatylǵan jáne probatsııa qyzmetinde tirkelgen azamattardy áleýmettik ońaltýdyń 2017-2019 jyldarǵa arnalǵan keshendi strategııasy aıasynda tıisti jumystar atqarylýda. Mysaly, 164/3 mekemesi (ortasha qaýipsizdik, Petropavl q, SQO) basshysynyń orynbasary Rústem Rahmetovtyń aıtýynsha, byltyr kolonııadan 317 adam bosatylǵan. Olardyń 74-i ǵana jaza merziminiń aıaqtalýyna baılanysty erkindikke shyqqan. Qalǵany - merziminen buryn shartty túrde bosatylǵan nemese jeńildetilgen jaza túrine aýystyrylǵan.
«Osy sanattaǵy adamdardy qaıta áleýmettendirý sheńberinde onnan astam adam beıimdeý ortalyǵyna ornalastyryldy. Taǵy ekeýine zeınetaqy jáne múgedektikti alýǵa qatysty kómek kórsetildi», - deıdi Rústem Rahmetov.
