Qazaqstanda 12 myńǵa jýyq sheteldik azamat ákimshilik jaýapkershilikke tartyldy - QR ІІM
ASTANA. QazAqparat - Qazaqstan aýmaǵynda bolý erejesin buzǵany úshin 12 myńǵa jýyq sheteldik azamat ákimshilik jaýapkershilikke tartyldy. Bul jaıynda QR ІІM Memlekettik til jáne aqparat departamentiniń dırektory Almas Sadýbaev aıtty, dep habarlaıdy QazAqparat.
«4 qazannan bastap Qazaqstan Respýblıkasynyń aýmaǵynda «Zańsyz kóshi-qon-2017» jedel aldyn alý sharasy ótýde. 11 qazandaǵy jaǵdaıǵa sáıkes el aýmaǵynda bolý erejesin buzǵany úshin 11 891 sheteldik, onyń ishinde alys shet eldiń 727 jáne TMD-nyń 11 164 azamaty ákimshilik jaýapkershilikke tartylyp, 1 627-si el aýmaǵynan shyǵaryldy», - dedi Almas Sadýbaev.
Onyń dereginshe, sheteldik jumys kúshin tartý jáne paıdalaný erejesin buzǵany úshin Qazaqstannyń da 420 azamaty ákimshilik jaýapkershilikke tartylǵan.
«Sotqa deıingi tergeýdiń biryńǵaı tizilimine kóshi-qon zańnamasyn buzǵany úshin 120 qylmystyq quqyq buzýshylyq tirkeldi. Іzdeýde júrgen 28 qylmysker ustaldy. Onyń 24-i Qyrǵyzstan jáne 4-eýi TMD azamattary. Qabyldaý-taratý ornyna jeke basyn kýálandyratyn qujaty joq 1 013 TMD azamaty qamaldy. Іshki ister organdary Qyrǵyzstan azamattaryna qatysty eshqandaı da arnaıy shara júrgizgen joq», - dedi departament basshysy.
Foto facebook.com
