Qazaqstanda 12 myńǵa jýyq kitaphana jumys isteıdi
ASTANA. KAZINFORM – Qazaqstanda Ulttyq kitap kúni men Kitaphanashylar kúni qatar atalyp ótýde. Bul kún Memleket basshysy Qasym-Jomart Toqaevtyń bastamasymen bekitilgen.
Elimizde búginde 12 myńǵa jýyq kitaphana jumys isteıdi, al salada 20 myńǵa tarta maman eńbek etedi. Sońǵy jyldary kitaphana isin jańǵyrtýǵa erekshe mán berilip, olar avtomattandyrylǵan júıelerge kóship, jasandy ıntellekt tehnologııalaryn engizip, elektrondyq resýrstaryn damytýda. Sonyń nátıjesinde azamattardyń kitap qoryna qashyqtan qol jetkizý múmkindigi keńeıip keledi.
– Kitap áli de bilim men tulǵalyq damýdyń mańyzdy qaınar kózi bolyp qala beredi. Kitaphanalar avtomattandyrylǵan júıelerge kóship, jasandy ıntellekt tehnologııalaryn engizip, elektrondyq resýrstaryn damytyp keledi. Sonyń nátıjesinde azamattarǵa kitap qoryna qashyqtan qol jetkizý múmkindigi keńeıe tústi. Elektrondyq kitaphana resýrstaryn paıdalanýshylar sany 30 paıyzǵa artyp, 718 myń adamǵa jetti. Sońǵy bes jylda onlaın oqyrmandar sany 4 mıllıonnan, elektrondyq formatta qaralǵan kitaptar sany 9 mıllıonnan asty. Ásirese balalar ádebıetine suranys artyp, bir jylda 75 paıyzǵa kóbeıdi, al qazaq jáne álem klassıkasyna qyzyǵýshylyq 50 paıyzǵa ósti, – delingen QR Mádenıet jáne aqparat mınıstrliginiń habarlamasynda.
Mınıstrlik málimetinshe, «Kitap oqıtyn ult» tujyrymdamasy aıasynda elde kitaphanalar salý jáne jańǵyrtý jumystary jalǵasýda. Astana, Almaty jáne Qyzylorda qalalarynda jańa Prezıdent kitaphanalaryn salý josparlanǵan. Qazirgi tańda 36 kitaphana jańǵyrtylyp, 2026 jyly taǵy 30 nysandy jańartý kózdelip otyr.
Ulttyq kitap kúnine oraı respýblıka kóleminde aýqymdy onkúndik uıymdastyrylǵan. Onyń aıasynda 100 myńǵa jýyq is-shara ótkizilip, túrli aqparattyq alańdarda kitap oqý mádenıetin nasıhattaýǵa arnalǵan 10 myńǵa jýyq materıal jarııalanǵan.
Sondaı-aq elordada ótken IX Astana Eurasian Book Fair aıasynda «Ulttyq kitap» baıqaýynyń qorytyndysy shyǵarylyp, úzdik shyǵarmalar anyqtaldy. Qalamgerlerdi qoldaý maqsatynda Prezıdenttik ádebı syılyq, «Qazaqstannyń halyq jazýshysy» ataǵy jáne «Aıboz» ulttyq ádebı syılyǵy taǵaıyndalǵan.
Mınıstrlik málimetinshe, sońǵy 10 jylda memlekettik qoldaý aıasynda 2 myńnan astam kitap jaryq kórip, olardyń jalpy taralymy 6 mıllıon danadan asqan.
Aıta keteıik, Qasym-Jomart Toqaev Qazaqstan halqyn Ulttyq kitap kúnimen quttyqtady.
