Qazaqstanda 12 bloger 1,4 mlrd teńge kóleminde qosymsha tabystaryn deklaratsııalady

ASTANA. KAZINFORM – Memlekettik kirister komıteti kiristerdi tómendetý boıynsha kameraldyq baqylaý týraly habarlamalardy oryndaý is-sharalaryn jalǵastyryp jatyr. Bul týraly Qarjy mınıstrliginiń Memlekettik kirister komıteti habarlady. 

Atalmysh sharalar barysynda 12 bloger óz erkimen 1,4 mlrd teńge kóleminde qosymsha tabystaryn deklaratsııalap, 73,6 mln teńge salyq tóledi. 

Búgingi tańda barlyǵy 854 blogerge «kiristi tómendetý» boıynsha zań buzýshylyqtar úshin 71,9 mlrd teńge somasynda kameraldyq baqylaý týraly habarlamalar jiberildi. 

Oryndaý merzimi – 30 jumys kúni.

Sonymen qatar 71,9 mlrd teńge kólemindegi aıyrmashylyqtar tólenbegen salyqtardyń somasy emes ekenin atap ótken jón. Kórsetilgen aıyrmashylyq somalary blogerlerdiń salyq deklaratsııalarynda kórsetilmegen boljamdy tabystaryn bildiredi.

Salyqtardyń eseptelýi men tólenýi salyq zańnamasynda belgilengen tıisti stavkalar boıynsha usynylǵan deklaratsııalarǵa sáıkes júzege asyrylady.

Kameraldyq baqylaýdyń máni – salyq tóleýshige tabystaryn óz erkimen deklaratsııalap, eseptelgen salyqtardy tóleýge nemese anyqtalǵan buzýshylyqtarmen kelispegen jaǵdaıda túsindirme berýge múmkindik berý. 

Eske sala keteıik, buǵan deıin álem elderinde blogerler qandaı salyq tóleıtinin jazǵan edik.