Qazaqstanda 1133 saıt esirtki taratýmen aınalysqan
«Nur Otan» partııasy Almaty qalalyq fılıalynyń baspasóz ortalyǵynda Almaty qalasynda sıntetıkalyq esirtki zattarynyń taralýyna qatysty brıfıng bolyp ótti. Oǵan qatysqan spıkerlerdiń habarlaýynsha, qala ákiminiń tapsyrmasy boıynsha «Nur Otan» partııasynyń músheleri Almaty qalalyq ІІD qyzmetkerlerimen birge halyq ishinde esirtki men sıntetıkalyq zattardyń taralýyna qarsy kúres júrgizetin bolady.
«Búgin partııa múshelerimen birge Almaty qalasynyń Medeý aýdanynda buryn esirtki saqtaýǵa qatysty birneshe ret qolǵa túsken er adamdy ustaýǵa qatysty arnaıy operatsııa júrgizdik. Ol kezekti márte esirtki alýǵa kelgende ustaldy. Jalpy, búginge deıin Almaty qalasynyń esirtki zattaryn taratýǵa qarsy kúres qyzmeti 70 saıt pen mesendjerdi japqan. Al búkil Qazaqstanda esirtki zattaryn taratýshy 1133 osyndaı saıttyń bary anyqtalǵan», - deıdi Saltanat Ázirbek.
Almaty qalasynyń bas psıhıatry Sapar Rahmensheevtyń aıtýynsha, ótken jyldan beri shahardyń Psıhıatrııalyq kómek kórsetý ortalyǵynda esirtkige táýeldi adamdardyń sany azaıyp ketken.
«Eki myńynshy jyldardyń basynda birinshi orynda adamdar geroındi kóp tutynsa, qazir sıntetıkalyq esirtki ony basyp ozdy. Máseleniń bári de sıntetıkalyq esirtkiniń arzan jáne ýyty geroınnen eki ese kúshti bolýynda. Ata-analar óz balalarynyń is-qımylyn árdaıym jiti baqylap júrýi kerek. Eń qaýiptisi - atalmysh esirtkini qabyldaǵan adamnyń mıyna ol birden áser etedi», - deıdi Sapar Rahmensheev.
Sonymen qatar, sıntetıkalyq esirtkilerdiń trafaretti jarnamasymen de belsendi túrde kúres júrip jatyr. Qalanyń árbir aýdandyq ishki ister basqarmasynda atalmysh faktilerdi anyqtaýǵa jumylǵan jumys toby qurylǵan. Ol jumys toby ákimshilik ǵımarattardyń ıelerimen jáne PIK ókilderimen birge jumys júrgizedi.
Sondaı-aq, «Nur Otan» partııasy Almaty qalalyq fılıaly tóraǵasynyń birinshi orynbasary Stanıslav Kankýrovtyń aıtýynsha, esirtkige qarsy kúres júrgizý úshin BAQ betterinde sıntetıkalyq esirtkini qabyldaǵan adamdardyń sýretteri jarııalanatyn bolady.
