Qazaqstanda 110 myń pedagog biliktiligin arttyrýda
ASTANA. QazAqparat - Aǵymdaǵy jyly 110 myńnan astam pedagog respýblıkalyq bıýdjet esebinen biliktilikti arttyrý kýrstarynan ótip jatyr. Bul týraly búgin QR Parlamenti Senatyndaǵy Úkimet saǵatynda Bilim jáne ǵylym vıtse-mınıstri Elmıra Sýhanberdıeva aıtty, dep habarlaıdy QazAqparat tilshisi.
«Jańartylǵan bilim berý mazmuny boıynsha 221 myń muǵalim daıyndaldy. Ol 78 paıyzdy quraıdy. Pedagogtardyń eńbekaqysyna Elbasy tapsyrmasyna sáıkes 30 paıyz ústemeaqy tólenýde jáne bıyl olardy attestattaýdyń jańa júıesi engizildi. 2018 jylǵy 1 qyrkúıekten bastap jańa júıe boıynsha attestattaýdan ótken 34 myń muǵalim biliktiligine baılanysty 30-dan 50 paıyzǵa deıin ústemeaqy alady. Attestattaýdan ótpegen 11 myń muǵalim 3-4 qarashada qaıta tapsyrdy», - dedi Elmıra Sýhanberdıeva.
Sonymen qatar onyń aıtýynsha, bıylǵy jyly 110 myńnan astam pedagog respýblıkalyq bıýdjet esebinen biliktilikti arttyrý kýrstarynan ótýde. Sonyń ishinde 8 myńnan astam pán muǵalimi jeke pánderdi aǵylshyn tilinde oqytý úshin tildik kýrstarda bilim alýda. Olardyń 5 myńǵa jýyǵy osy oqý jylynan bastap sabaq berýge kirisken. «Ustaz» ortalyǵy barlyq óńirlerde aǵylshyn tilinde sabaq bere bastaıtyn 4,5 myńnan astam muǵalimge qoldaý kórsetip jatyr.
«Ótken oqý jylynda 510 mektep keıbir pánderdi aǵylshyn tilinde ilki joba retinde oqytsa, osy oqý jylynda 2200-den astam mektepte aǵylshyn tili elementteri qoldanylýda. Pedagogter, onyń ishinde aǵylshyn tiliniń muǵalimderin, psıhologtardy 2019 jyldan onlaın oqytý josparlanýda jáne «Órleý» baǵdarlamasymen voýcherlik júıe boıynsha birqatar halyqaralyq kýrstardan keıingi qoldaý kórsetiledi», - dedi ol.
