Qazaqstanda 11 adamǵa hımııalyq kastratsııa jasalady
NUR-SULTAN. QazAqparat – Qazaqstanda 11 adamǵa hımııalyq kastratsııa jasalady. Bul týraly QazAqparat QR Qylmystyq atqarý júıesi komıtetine silteme jasap habarlaıdy.
«Májbúrli túrde hımııalyq kastratsııa sharasy sot-psıhatrııalyq saraptama nátıjesine qaraı sot sheshimimen taǵaıyndalady. QR Qylmystyq kodeksine sáıkes, mundaı jaza kámeletke tolmaǵandardyń jynystyq tıispeýshiligine qarsy qylmys jasaǵan, jasy 18-den asqan adamdarǵa qoldanylady. 2018 jyldyń 1 qańtarynan beri qylmystyq atqarý júıesine sottan osy mándegi úkim alǵan 11 adam tústi. Atalmysh jandardyń bári dárigerlik-konsýltatıvtik komıssııanyń qaraýynan ótti. Qazirgi tańda protsedýra Pavlodar jáne Aqmola oblysyndaǵy mekemelerde eki adamǵa júrgizilip jatyr. Osy jaza túri taǵaıyndalǵandar týraly basqa málimetter qupııa jáne QR Konstıtýtsııasynyń 18-babynyń 1-tarmaǵyna sáıkes taratýǵa jatpaıdy» delingen komıtettiń aqparatynda.
