Qazaqstanda 102 kásiporyn 408 jumyskerine jalaqy boıynsha bereshek
ASTANA. KAZINFORM — Jyl basynan beri memlekettik eńbek ınspektorlary 11 354 jumyskerdiń quqyǵyn qorǵady, dep habarlaıdy Eńbek jáne halyqty áleýmettik qorǵaý mınıstrliginiń baspasóz qyzmeti.
2026 jylǵy 1 naýryzdaǵy jaǵdaı boıynsha memlekettik eńbek ınspektorlary respýblıkanyń 102 kásiporny 408 jumyskerge 284 mln teńgege jalaqy boıynsha bereshek ekenin anyqtady. Sonymen birge túrli uıymdarda júrgizilgen tekserýler barysynda eńbek quqyǵy buzylýynyń 1 myńnan astam faktisi áshkere boldy.
— Jalaqy boıynsha bereshegi jáne eńbek quqyǵynyń buzylýy anyqtalǵan kásiporyndardyń basshylaryna oryndaýǵa mindetti 707 uıǵarym berildi jáne 89 mln teńgeden astam somaǵa aıyppul salyndy. Qabyldanǵan sharalardyń, onyń ishinde jalaqy boıynsha bereshekti óteýdiń qatań kesteleri men merzimderin belgileýdiń nátıjesinde 354 jumyskerdiń quqyqtary qorǵaldy. Olarǵa 253 mln teńge tólendi, — delingen mınıstrliktiń resmı habarlamasynda.
Budan basqa, eńbek zańnamasynyń saqtalýyna memlekettik baqylaýdy qamtamasyz etý máseleleri QR Eńbek jáne halyqty áleýmettik qorǵaý mınıstrliginiń erekshe baqylaýynda.
2026 jylǵy 1 naýryzdaǵy derekter boıynsha memlekettik eńbek ınspektorlary 1125 tekserý júrgizdi, onyń barysynda 1228 buzýshylyq anyqtaldy, onyń ishinde: eńbek salasynda — 1055; eńbek qaýipsizdigi jáne eńbekti qorǵaý boıynsha — 161; halyqty jumyspen qamtý boıynsha — 12.
Qabyldanǵan sharalardyń nátıjesinde 11 354 jumyskerdiń eńbek quqyǵy qorǵaldy.
Buǵan deıin Túrkistanda Jasyl aımaqtyń 550-ge jýyq jumysshysynyń jalaqysy ýaqtyly tólenbegeni belgili boldy.