Qazaqstanda 100 tonnaǵa jýyq sapasyz ónim joıylǵan - Memlekettik sanıtarlyq-epıdemıologııalyq qadaǵalaý
ASTANA. 13 maýsym. QazAqparat - Qazaqstanda saýda nysandaryn tekserý barysynda 100 tonnadan astam azyq-túlik tutynýǵa jaramsyz dep tabyldy jáne olar tárkilenip, joıyldy. QR Premer-Mınıstri resmı saıtynyń habarlaýynsha, bul týraly QR Densaýlyq saqtaý mınıstrliginiń Memlekettik sanıtarlyq-epıdemıologııalyq komıteti tóraǵasynyń orynbasary Aıjan Esmaǵambetova málim etken.
«Jyldyń basynan azyq-túlik qaýipsizdigin baqylaý maqsatynda epıdemıologııalyq qadaǵalaý organdary 100 tonnaǵa jýyq azyq-túlik ónimderi satylymnan alyp, joıdy. Onyń ishinde sút ónimderi - 43 tonna, sýsyndar - 21 tonna, et ónimderi - 14 tonna jáne kondıterlik ónimder - 10 tonna», - dedi A.Esmaǵambetova.
Sonymen qatar ol jiti ishek ınfektsııalarymen syrqattanýdy aqparattandyrý jáne aldyn alý deńgeıin arttyrý maqsatynda barlyq óńirlerde aktsııalar júrgizilip jatqanyn, onyń barysynda satyp alynǵan azyq-túlik ónimderiniń qaýipsizdigin testileýge bolatynyn atap ótti.
Aıta ketý kerek, atalǵan zertteýler tegin negizde ótkizilip, 30 qalada jáne 139 eldi mekende 200-den astam azyq-túlik bazary, 93 iri saýda nysandary, 12 jármeńke jáne 89 saýda nysandary qamtyldy.
Epıdemıologııalyq qadaǵalaý komıteti basshysynyń orynbasary aktsııalar turaqty túrde jaz-kúz mezgilinde ótkizilip turatynyn aıtty.
