Qazaqstanda 100-shi balaǵa búırek transplantatsııasy sátti jasaldy
NUR-SULTAN. QazAqparat - Ana men bala ulttyq ǵylymı ortalyǵynda 100-shi balaǵa búırek transplantatsııasy sátti jasaldy, dep habarlaıdy QazAqparat UMC korporatıvtik qoryna silteme jasap.
29 sáýirde Ana men bala ulttyq ǵylymı ortalyǵynda elimizdegi 100-shi balaǵa búırek transplantatsııasy jasalyp, ota sátti ótti.
Ortalyqta búırek transplantatsııasy 2012 jyldan beri jasalady. 2015 jyldan bastap Ana men bala ulttyq ǵylymı ortalyǵynda balalarǵa qaıtys bolǵan adamdardan búırek transplantatsııasy jasalady.
Búıregi aýystyrylǵan eń kishkentaı balaǵa 3 jas 6 aı, salmaǵy nebári 10,5 keli bolǵan. Otandyq mamandar jasaǵan búırek transplantatsııasynyń nátıjesi álemdik klınıkalarmen birdeı. Múshe transplantatsııalanǵan balalardyń ómir súrý deńgeıi Eýropadaǵydaı. Búgingi tańda bul kórsetkish 94,4% deıin jetedi.
«Balalardy operatsııaǵa durys daıyndaý ǵana emes, sonymen qatar Nefrologııa jáne dıalız bóliminde ótetin operatsııadan keıingi emdeý óte mańyzdy. Osyǵan baılanysty bizdiń mamandarymyzǵa dáriger-efferentolog, eresek reanımatsııa-anestezıologııa bóliminiń komandasyna, balalar reanımatsııasy jáne anestezıologııa bóliminiń komandasyna, dáriger-anestezıolog, hırýrgter men barlyq ýrologtarǵa, búırek transplantatsııasyna qatysqan medbıkeler men anestezıologtarǵa zor alǵys bildiremiz», delingen habarlamada.
Búgingi tańda atalmysh ortalyq búırek transplantatsııasy boıynsha Qazaqstanda jalǵyz. Otandyq mamandardyń emniń osy kúrdeli túrin meńgerýiniń arqasynda qazir búırek pen baýyrdy tranplantatsııalaýǵa muqtaj balalarǵa sheteldik klınıkalarǵa barmaı-aq qoıýyna bolady.
