Aqtóbe oblysynda áıel kásipkerlerge arnalǵan «KözI’m» mentorlyq mektebi iske qosyldy
ASTANA. KAZINFORM – Aqtóbe oblysynda «KözI’m» jobasy bastaý aldy. Jobanyń basty ereksheligi – onyń tereń praktıkalyq baǵytta júzege asyrylýynda.
Baǵdarlama óńirlik «Atameken» kásipkerler palatasy Іsker áıelder keńesiniń tóraıymy, óńirge tanymal metsenat Kúlparshyn Aıdarhanovanyń jeke bastamasymen qolǵa alyndy. Kásipkerlik salasyndaǵy tájirıbeli kóshbasshy retinde ol qatysýshylardy tek shabyttandyryp qana qoımaı, óz isin damytýǵa arnalǵan naqty quraldar men tıimdi sheshimder usynýdy maqsat etedi.
Kúlparshyn Aıdarhanova jyl sońyna deıin joba qatysýshylaryna tálimger retinde qoldaý kórsetedi. Mundaı jan-jaqty súıemeldeý kásipker áıelderdiń bıznesin keńeıtip, jańa deńgeıge kóterýine múmkindik beredi. Osy maqsatta mentor ár qatysýshynyń kásipornyna arnaıy baryp, bıznestiń damý múmkindikterin taldap, ony jetildirý joldaryn usynyp jatyr.
Jeke taldaýǵa alynǵan alǵashqy nysan – kásipker Marjan Qoshymovanyń jol boıyndaǵy dámhanasy boldy. Tálimger mekemeniń zamanaýı bezendirilýin, as úıdegi minsiz tazalyqty jáne kásipkerdiń ózi ázirlegen fırmalyq palaýyn joǵary baǵalady. Búginde bul taǵam túski jáne keshki ýaqytta kelýshiler arasynda erekshe suranysqa ıe bolyp, tapsyryspen de jıi satyp alynady.
Kúlparshyn Aıdarhanova kásipkermen birge dámhanany odan ári damytýǵa arnalǵan kezeń-kezeńimen júzege asyrylatyn jospar ázirledi. Negizgi mindetterdiń qatarynda onlaın-tapsyrys júıesin iske qosý, marketıngtik jumysty kúsheıtý jáne Aqtóbe qalasynyń ózinen jańa brendtik núkte ashý máseleleri bar.
Sondaı-aq tálimger jaqyn mańdaǵy mekemelerdiń qyzmetkerlerin klıent retinde tartý boıynsha usynystaryn aıtty. Máselen, kórshiles ornalasqan perzenthanadan shyǵatyn analarǵa arnaıy usynystar ázirleý josparlanyp otyr. Budan bólek, dámhana mańynan avtobýs aıaldamasyn ornalastyrý máselesi boıynsha jergilikti atqarýshy organdarmen kelissóz júrgizý jáne qyzmetkerler jumysynyń tıimdiligin arttyrý kózdelgen.
«Áıelder búginde eńbek naryǵynyń tolyqqandy qatysýshylary. Olar jumys oryndaryn ashyp, salyq tólep, Aqtóbe oblysynyń ekonomıkasyn damytýǵa óz úlesin qosyp keledi. “KözI’m” jobasy áıelder kásipkerligin odan ári nyǵaıtyp, damýǵa qajetti praktıkalyq quraldardy usynady. Árbir áıel úshin ózin jalǵyz sezinbeı, ózimen birge alǵa umtylatyn myqty jandardyń qoldaýyn seziný asa mańyzdy. Joba qatysýshylary úlken joldyń basynda turǵanymen, olardyń áleýeti men batyldyǵy meni erekshe tánti etedi», – deıdi Kúlparshyn Aıdarhanova.
Joba kásipkerlik ortada úlken qyzyǵýshylyq týdyrdy. Uıymdastyrýshylarǵa 36 ótinim kelip tússe, olardyń arasynan kásipkerlikti ana bolý mindetimen qatar alyp júrgen jáne ekonomıkanyń túrli salalarynda jumys isteıtin 8 qatysýshy iriktelip alyndy.
Baǵdarlama aıasynda qatysýshylar áleýmettik jelilerde ilgeriletý (SMM), jeke brendti damytý jáne kóshbasshylyq qabiletterdi jetildirý baǵyttary boıynsha bilim alady. Olar: Saltanat Qudaıbergenova (tigin óndirisi), Nazym Jaıdaqbaeva (ekoferma, eshki sútinen ónim óndirý), Aıgúl Jumaǵalıeva (mýzykalyq mektepter jelisi), Aqtoty Isetova (jartylaı fabrıkattar óndirisi), Juldyz Berjanova (balalar dúkenderi jelisi), Marjan Qoshymova (qoǵamdyq tamaqtaný salasy), Álııa Quqanova (durys tamaqtaný kofehanalary) jáne Aınur Ermuhanova (qarttarǵa arnalǵan zamanaýı pansıonat baǵytyndaǵy áleýmettik joba).
Jobanyń negizgi maqsaty – óńirdegi áıelder kásipkerligin keńeıtý, jańa jumys oryndaryn ashý jáne turaqty bıznes-modelderdi qalyptastyrý. Osyndaı jergilikti jerde júrgiziletin jeke mentorlyq qoldaý «KözI’m» qatysýshylaryna óz jobalaryna tıimdi sheshimderdi engizip, bıznesterin jańa deńgeıge shyǵarýǵa múmkindik beredi.
