Qazaqstanda 100 kıberqaýipsizdik mamanyn daıarlaý bastaldy
ASTANA. KAZINFORM – Qazaqstanda «Red Team & Blue Team Cyber Academy» bilim berý baǵdarlamasyna irikteý aıaqtalyp, kıberqaýipsizdik salasynda tegin bilim alatyn 100 grant ıegeri anyqtaldy.
Jasandy ıntellekt jáne tsıfrlyq damý mınıstrliginiń málimetinshe, jobaǵa elimizdiń barlyq óńirinen 1567 ótinim túsken. Іrikteý nátıjesinde 361 qatysýshy «Ulttyq kıberqalqan» CTF-týrnırine qatysyp, onyń qorytyndysy boıynsha úzdik 100 adam grant jeńip aldy.
«Bilikti kadrlardy daıarlaý – búginde memleketimizdiń tsıfrlyq egemendiginiń negizi. «Red Team & Blue Team Cyber Academy» baǵdarlamasy qazirgi zamanǵy kıberqaýipterge tıimdi qarsy turýǵa jáne Qazaqstannyń mańyzdy tsıfrlyq ınfraqurylymynyń turaqty jumys isteýin qamtamasyz etýge qabiletti sarapshylardyń jańa býynyn qalyptastyrýǵa baǵyttalǵan», – dedi Jasandy ıntellekt jáne tsıfrlyq damý vıtse-mınıstri Dosjan Musalıev.
Baǵdarlama Astana Hub-pen birlesip, Tech Orda jobasy jáne «Memlekettik tehnıkalyq qyzmet» AQ-nyń Interactive range platformasy negizinde júzege asyrylyp jatyr.
Joba IT salasynda bazalyq bilimi bar 18 ben 45 jas aralyǵyndaǵy azamattarǵa arnalǵan. Qatysýshylar alty aı boıy onlaın formatta oqyp, kıberqaýipsizdik salasyndaǵy praktıkalyq daǵdylardy meńgeredi.
Oqý baǵdarlamasy eki negizgi baǵyttan turady. Red Team baǵyty aqparattyq júıelerdiń osal tustaryn anyqtaý men testileýge baǵyttalsa, Blue Team baǵyty kıbershabýyldardy anyqtaý, monıtorıng júrgizý jáne qorǵanys júıelerin jetildirý daǵdylaryn damytýǵa arnalǵan.
Joba uıymdastyrýshylarynyń aıtýynsha, baǵdarlamanyń ereksheligi – onyń tájirıbelik baǵytynda. Qatysýshylar naqty kıbershabýyldar men qorǵanys stsenarııleri negizinde oqytylady.
Aıta keteıik, Úkimet kıberqaýipsizdik erejelerin jańartty.
