Qazaqstanda 100 er adamnyń tek 2-3-eýiniń ǵana uryǵy jaramdy
ASTANA. QazAqparat - Qazaqstandaǵy jasandy uryqtandyrýdyń avtory, bıologııa ǵylymdarynyń doktory Saltanat Baıqoshqarova jýrnalısterge erkekterdiń reprodýktıvti densaýlyǵy jaıynda aıtyp berdi, dep xabarlaıdy QazAqparat tilshisi.
"Negizi, bizde 100 erkektiń ishinen tek eki-úsheýiniń ǵana uryǵy jaraıdy. Barlyq analızderin tekseresiń. Jarasa, alty aı karantınge turady", - deıdi S.Baıqoshqarova.
Ǵalymnyń aıtýynsha, donorlyq uryq úshin tólenetin aqsha da kóp emes. Al jumystyń mashaqaty bastan asady.
"Reseıdiń Sankt-Peterbýrg qalasyndaǵy bir ortalyqtaǵy áriptesterim aıtady, biz 400 donordyń ishinen eki-aq adamdy tańdadyq deıdi. Sosyn bireýiniń túri unamaıdy, bireýiniń taǵy birdeńesi unamaıdy. Endi, kez kelgen adamdy donorlyqqa almaısyń ǵoı. Mysaly, Túrkııada erkektiń donorlyq uryǵyn tek baýyrynan ǵana alýǵa ruqsat beredi. Áıelderdiń máselesi de solaı. Bizde jalpy ruqsat bar. Biraq jaqyn týysqandaryń bolmasa, bári anonımdi túrde júrgiziledi. Keıbir máseleler qupııa saqtalady. Óıtkeni erteń áıel baryp, myna bala seniki dep, alıment talap etýi múmkin. Anaý baıǵus 10-20 myń tabamyn dep, ózine taǵy problema taýyp alady. Sosyn moraldyq jaǵy bar, zańdyq jaǵy bar. Qıyn másele. Maǵan kúıeý men áıeldiń ortasynda jumys istegen unaıdy. Úshinshi adam qosyldy ma, ol - problema. Tórtinshi adam - sýrrogat ana qosylsa, ol tipten problema", - dep atap kórsetti S.Baıqoshqarova.
Aıta keteıik, búgin Astanada ótken konferentsııa aıasynda S.Baıqoshqarova jasandy uryqtandyrýdy barynsha arzandatýǵa bolatynyn jetkizdi.
