Qazaqstanda 100 dene shynyqtyrý kesheni salynýda

NUR-SULTAN. QazAqparat – Elimizdiń óńirlerinde 100 dene shynyqtyrý-saýyqtyrý kesheniniń qurylysy júrip jatyr. Bul týraly QR Mádenıet jáne sport vıtse-mınıstri Erlan Qojaǵapanov aıtty, dep habarlaıdy QazAqparat tilshisi.

«Buqaralyq sporttyń damýyna sport nusqaýshylary úlken úles qosýda. Búgingi tańda respýblıkada turǵylyqty jeri boıynsha 3 myńnan astam sport nusqaýshysy jumys júrgizýde, onyń ishinde aýyldyq jerlerde 1 200-ge jýyq sport nusqaýshysy bar», - dedi E. Qojaǵapanov Májilistiń Áleýmettik-mádenı damý komıtetiniń keńeıtilgen otyrsynda.

Onyń aıtýynsha, eńbek ujymdarynda dene shynyqtyrý-saýyqtyrý jáne sport jumysyn uıymdastyrý máseleleri úlken mańyzǵa ıe. Búgingi kúni dene shynyqtyrý ujymdarynyń sany 21 334-ke jetti. Dene shynyqtyrý jáne sport ujymdarynda 130 myńnan astam sport sektsııasy quryldy, onda sabaqtarmen 5,3 mln adam qamtyldy.

Sporttyń jaı-kúıi men damýy qajetti sporttyq ınfraqurylymnyń bolýyna baılanysty ekeni jasyryn emes. Osy maqsatta elimizde 41 352 sport ǵımaraty jumys isteıdi. Elimizdiń óńirlerinde 100 dene shynyqtyrý-saýyqtyrý kesheniniń (DSK) qurylysy júrgizilýde, onyń 13-i 2019 jyly paıdalanýǵa berildi.

«2020 jyly 14 DSK paıdalanýǵa berildi, onyń ishinde 7 DSK «Aýyl – El besigi» baǵdarlamasy boıynsha, 10 DSK aıaqtalý satysynda», - dedi vıtse-mınıstr.

Budan buryn habarlanǵandaı, búgingi otyrys barysynda buqaralyq sport óńirlerdegi kóptegen azamat úshin áli de qoljetimdi emes ekeni aıtyldy.

Erlan Qojaǵapanovtyń sózine qaraǵanda, byltyr elimizdiń dene shynyqtyrý-sport qozǵalysyna 5,9 mln adam qatysqanyn aıtty.