Qazaqstanda 100-den astam shaı men jańa qýyrylǵan 20-dan astam kofe túrlerin usynatyn álemde balamasy joq kofeterııler jumys jasaýda
ALMATY. 28 shilde. QazAqparat - Qazaqstandyq kásipkerler álemde joq kafeterıı franchaızıngin damytýda. Almatydaǵy «Tea & Coffee Garden» kafeterııiniń ákimshisi Irına Naıjenovanyń aıtýynsha, olar ony 2005 jyly oılap tapqan.
«Bizdiń basty ereksheligimiz - tańdaýdyń alýan túrliliginde. Álemde áli kúnde deıin óz klıentterine 100-den astam shaı túri men 20-dan astam kofe plantatsııalarynan ákelingen jańadan qýyrylǵan kofe usynatyn birde-bir kofeterıı joq. Qazir Almatyda - 2, Astanada -1 kofeterıı jumys jasaýda. Astanada biz ony franchaızıng arqyly 3 jyl buryn ashqanbyz», - deıdi I.Naıjenova. Qazaqstanda óndirilgen ekologııalyq jaǵynan taza un men sút ónimderin paıdalanatyn olardyń biregeı ónimderiniń dámin tatqan shaıqorlar men kofe tutynýshylary turaqty klıentke aınala bastaǵan. Tipti onda bir ret bolǵan sheteldikter Qazaqstanǵa kelgende munda mindetti túrde bir bas suǵyp ketýdi ádetke aınaldyra bastaǵan kórinedi.
Irına Naıjenovanyń sózine qaraǵanda: «Bul bızneske qyzyǵýshylar kóp. Otandastarymyzdyń kóp jaǵdaıda óz isin bastaýyna qarjy máselesi qolbaılaý bolýda. Sondyqtan biz «Damý» kásipkerlikti damytý qorynan kómek surap otyrmyz. Qazaqstandyq franchaızıng óz elimizde damyp, shet elderge de taralý úshin. Jalpy franchaızıng quny 30 myń dollarǵa baǵalanǵanymen, talap boıynsha ony ıelenýshide keminde 90 sharshy metrlik saýda alańy. Sondaı-aq jobaǵa ınvestıtsııa jasaý úshin 80-100 myń dollar kóleminde aınalym qarajaty bolý kerek. Bul qajetti qural-jabdyqtar men assortımenti saqtaý úshin qajet.Óıtkeni munda qyzmet pen ónim sapasyna aıryqsha mán beriledi».
