Qazaqstanda 100-den astam memleketten kelgen bilikti mamandar qyzmet etedi
«Ótken jyldyń sońynda elimizde kóshi-qon zańnamasyna birqatar ózgertýler engizildi. Bul turǵyda joǵary bilikti shetel mamandaryn tartýǵa qolaıly jaǵdaıdy qurýǵa baǵyttalǵan sharalar qamtylǵan jáne olar 2017 jyldan bastap kúshine enetin bolady. Búginde kóptegen elder sekildi Qazaqstan da kvotalaý jáne jumysqa turý ruqsatnamasyn berý júıesin qoldanýda. Sońǵy úsh jylda kvotalar aıasynda bizdiń eldiń jumys berýshileri tarapynan ortasha eseppen alǵanda jylyna 30 myń shetel mamany tartyldy. Bul óz kezeginde eldiń ekonomıkalyq belsendi halqynyń 0,3 paıyzyn quraıdy»,-dedi vıtse-mınıstr «Kóshi-qonnyń áleýmettik-ekonomıkalyq áserleri: mıgranttardyń qorǵansyzdyǵy jáne Ortalyq Azııadaǵy ıntegratsııalyq qajettilikter» atty dóńgelek ústelde.
Onyń sózine qaraǵanda, Qazaqstanda álemniń 100-den astam elinen kelgen mamandar qyzmet etýde. Sonyń ishinde negizgileri Qytaı, Túrkııa, Úndistannan tartylýda.
Munymen qosa B. Nurymbetov Qazaqstan joǵary bilikti eńbek resýrstaryn tartýmen qatar, mamandyǵy joq jumys kúshi de qabyldanyp jatqandyǵyn atap ótti.
«Byltyr elimizde ishki ister organdarynyń ruqsatymen úı sharýashylyqtarynda TMD elderinen 141 myń shetel jumysshylary qyzmet atqardy. Sonymen qatar baqylanbaıtyn zańsyz eńbek kóshi-qony saqtalýda, ıaǵnı zańsyz kelgen jumysshylar tartylǵan salalarda el úshin jáne jumysshylardyń ózderi úshin ekonomıkalyq jáne áleýmettik problemalar týyndaıdy. Jasyryn mıgranttardyń qyzmeti negizinen bazarlardaǵy saýdada, qurylysta, aýyl sharýashylyǵynda baıqalýda»,-dedi vıtse-mınıstr.
Aıta keteıik, kóshi-qon máselesine arnalǵan atalǵan dóńgelek ústel QR Tuńǵysh Prezıdenti - Elbasy kitaphanasynda ótip jatyr. Birqatar memleketterden kelgen mamandar osy saladaǵy problemalardy talqylaýda.