Qazaqstanda 100-den astam etnos tatýlyq pen úılesimde ómir súrip jatyr – Prezıdent
«Qazaqstan halqy túrli órkenıetter men dinderdiń dástúrin, ashyqtyq pen toleranttylyq rýhyn boıyna sińirgen. Sondyqtan alýandyqtyń tutastyǵy biz úshin negizgi taǵan bolyp sanalady. Qazirgi tańda Qazaqstanda 100-den astam etnos tatýlyq pen úılesimde ómir súrip jatyr. 18 konfessııanyń 4 myńǵa jýyq dinı birlestigi erkin qyzmet etýde», - dedi Qasym-Jomart Toqaev.
Memleket basshysy muny qazaqstandyqtar elimizdiń baǵa jetpes syıy jáne biregeı baılyǵy dep sanaıtynyn atady.
«Elimizde jáne búkil álemde dıalogty nyǵaıtý – Qazaqstan saıasatynyń asa mańyzdy bóligi. Búgingi sez sonyń jarqyn dáleli. Buǵan deıingi forýmdardyń deklaratsııalarynda radıkalızm, kúsh kórsetý men kıkiljińder qatań synalǵan», - dedi Prezıdent.
Aıta ketý kerek, eki kúnge sozylatyn sezge 50 elden 100-den astam delegatsııa, onyń ishinde ıslam, hrıstıan, býddızm, ıýdaızm, ındýızm, daosızm, zoroastrızm, sıntoızm dinderiniń ókilderi, sondaı-aq saıasatkerler men qoǵam qaıratkerleri, halyqaralyq uıym músheleri keldi. Olardyń arasynda Rım Papasy Frantsıskten bólek Ál-Azhardyń Joǵarǵy ımamy Ahmed Mohammed Ahmed at-Taıeb, Ierýsalım Patrıarhy III Teofıl, Ashkenazdyń bas ravvıni Davıd Laý, Izraıldiń Bas sefard ravvıni Itshak Iosıf jáne basqa da dinı jetekshiler, birqatar halyqaralyq uıymnyń ókilderi bar.
Keshe keshke Prezıdent Qasym-Jomart Toqaev sezdiń arnaıy qonaǵy Rım Papasy Frantsıskti elorda áýejaıynan kútip aldy.
Keıinnen Qazaqstan Prezıdenti men Rım Papasy azamattyq qoǵam jáne dıplomatııalyq korpýs ókilderimen kezdesti.
Kezdesýde katolık shirkeýiniń basshysy Qazaqstannyń ólim jazasynan bas tartqanyna joǵary baǵa berip, Qazaqstan Konstıtýtsııasy nanym-senim bostandyǵynyń kepili ekenin atady.
Din kóshbasshysy Frantsısktiń elimizge memlekettik sapary Rım Papasy Ioann II Pavel Qazaqstanǵa 2001 jyly kelgennen keıin alǵash ret ótip jatyr. Búgin ol elordada messa ótkizedi. Oǵan 3 myńǵa jýyq adam qatyspaq.
