Qazaqstanda 100-den astam adam turmystyq janjal kesirinen kóz jumǵan
ASTANA. QazAqparat - Qazaqstanda byltyr jáne aǵymdaǵy jyly 100-den astam adam turmystyq janjal kesirinen kóz jumǵan. Bul týraly búgin QR Іshki ister mınıstri Qalmuhanbet Qasymov málim etti.
Osyǵan baılanysty mınıstr ýchaskelik ınspektorlardyń jumysyn synǵa aldy.
«Bizdiń ýchaskelik ınspektorlar ál-aýqaty nashar otbasylarmen josparly jumysty tıisti túrde atqara bermeıdi. Janjaldy aldyn alýǵa baǵyttalǵan is-sharalar merziminde jasalmaıdy. Bul jaǵdaı turmystyq janjaldar barysynda kisi óliminiń sanyn arttyryp otyr. Qazaqstanda byltyr jáne aǵymdaǵy jyly 100-den astam adam turmystyq janjal kesirinen kóz jumǵan», - dedi mınıstr.
Q.Qasymovtyń sózi boıynsha, ınspektorlar ózine tıesili aýmaqta ishkiliktiń aldyn alýǵa qatysty sharalary nátıjesiz aıaqtalatynyna kóńil aýdardy.
«Turmystyq jaǵdaıda jasalǵan aýyr qylmystardyń 10 paıyzdan astamy ishkiliktiń kesirinen bolatyny da tegin emes», - dedi QR ІІM basshysy.
Mınıstrdiń aıtýyna qaraǵanda, jumys sapasyna ýchaskelik ınspektorlardyń eńbek etýine qajetti materıaldyq qamsyzdandyrýdyń jetispeýshiligi áser etýi yqtımal.
«Birqatar aımaqtarda ınspektorlardyń jumysyna qajetti barlyq jaǵdaılar jasalmaǵan. Elde bar 2700 ýchaskelik ortalyqtardyń 1400-ine jóndeý jumystary qajet. Onyń ústine qosymsha 430 ortalyqty jańadan salý qajet. Ýchaskelik ınspektorlardyń úshten birinde páter joq, aýyldyq ınspektorlardyń úshten birinde kólik pen radıostansa joq», - dedi QR ІІM mınıstri.
