Qazaqstanda 10 jylda týberkýlezben syrqattaný deńgeıi 2,2 esege tómendedi - QR DSÁDM

ASTANA. QazAqparat - Qazaqstanda týberkýlezben syrqattaný 2,2 esege, ólim jaǵdaıy 5 esege azaıdy, dep habarlaıdy QR Densaýlyq saqtaý jáne áleýmettik damý mınıstrligi.

Vedomstvonyń málimetinshe, sońǵy 10 jylda Qazaqstanda týberkýlezben syrqattaný 2,2 esege, ólim jaǵdaıy 5 esege tómendedi. 2015 jyly syrqattaný 11,9%-ǵa azaıyp, 100 myń turǵynǵa shaqqanda 58,5-ti qurady (2014 jyly - 66,4), ólim jaǵdaıy 22,4%-ǵa tómendep, 100 myń turǵynǵa shaqqanda 3,8-di qurady (2014 jyly - 4,9).

2015 jyly alǵashqy ret sezimtal týberkýlezben syrqattanǵan adamdardy emdeý tıimdiligi jaqsaryp, 2014 jyly 86,4% bolǵan kórsetkish 87,6%-dy qurady (DDU standarty- 85%).

2015 jyldyń nátıjesi boıynsha syrqattanǵan adamdardy týberkýlezge dárilik tózimdiligi kóp ekinshi qatardaǵy preparattarmen qamtamasyz etý azamattyq sektorda 99,4%,-dy, penıtentsıarlyq sektorda - 98%-dy (DDU standarty - 85%) qurady. Syrqattanǵan adamdardy týberkýlezge dárilik tózimdiligi keń úshinshi qatardaǵy preparattarmen qamtamasyz etý azamattyq sektorda 99,8% (DDU standarty- 85%) boldy.

«Qazirgi tańda elimizdiń barlyq aımaqtary týberkýlezdi, sonymen birge, onyń dárilerge tózimdiligi bar túrlerin dıagnostıkalaýǵa arnalǵan zamanaýı qural-jabdyqtarmen qamtamasyz etilgen. Respýblıkada qajetti dárilik zattardyń kólemi jetkilikti dárejede», - dep málimdedi mınıstrlikte.