Qazaqstanda 10 JOO Nazarbaev ýnıversıtetimen teńestiriledi

ASTANA. QazAqparat - QR Memlekettik xatshysy Gúlshara Ábdiqalyqova Túrkııadan kelgen qazaq jastaryna otandyq bilim salasyndaǵy reformalar týraly aıtyp berdi. Osy oraıda Nazarbaev ýnıversıtetiniń tájirıbesin taratý jaıy sóz boldy, dep xabarlaıdy QazAqparat tilshisi.

"Endi, biz burynǵy júıeden jańa júıege ótý úshin jańadan oqý oryndaryn qurdyq. Ol - Nazarbaev ýnıversıteti. Sizder keshe bardyńyzdar. Atalǵan ýnıversıtet dúnıejúzindegi barlyq jaqsy tájirıbeniń negizinde qurylǵan. Ondaǵy maqsatymyz - birinshiden, eń myqty jastardy tartý. Ekinshi jaǵynan - osy ýnıversıtettiń tájirıbesin 120 ýnıversıtetke birtindep translıatsııa jasap taratý. Ol protsess júrip jatyr. Árıne, bir kúnde bolmaıdy. Qazir on ýnıversıtetti de pılottyq negizde qarastyryp jatyrmyz. Osy Nazarbaev ýnıversıtetine teńestirý, odan ary qaraı basqa ýnıversıtetter de sol deńgeıge tartylady de oılaımyz. Bolashaqta oqımyz deseńizder, kelýge bolady", - dedi G.Ábdiqalyqova.

 

Memlekettik xatshy daryndy balalardy anyqtaý júıesin de túsindirip berdi. Osy oraıda G.Ábdiqalyqova Nazarbaev zııatkerlik mektepteri, "Daryn" men "Zerdeniń" tájirıbesine toqtaldy. Atalǵan uıymdar bilimge qushtar balalardy tereńdetip oqytady.

Aıta keteıik, búgin Aqordada QR Memlekettik xatshysy Gúlshara Ábdiqalyqova Túrkııadaǵy qazaq jastarymen kezdesti. Olardyń barlyǵy túrik jerinde dúnıege kelgen. Qazir Ystanbul men Ankaranyń úzdik ýnıversıtetterinde bilim alyp júr.

"Jaqynda men Túrkııaǵa saparmen barǵanda qazaq dıasporasymen úlken kezdesý ótkizdim. Sol kezde jastar týǵan elin bilse eken, jaqyn tanyssa eken dep, kelisken bolatynbyz. Sóıtip, senderdi kóptegen jastardyń ishinen iriktep, eń bilimdi, úsh tildi meńgergen úzikterdi tańdap aldyq. Sol jerdegi zııaly qaýym aıtty. Sondyqtan senderdi osyndaı úlken jetistikpen quttyqtaımyn", - dep atap kórsetti G.Ábdiqalyqova.