Qazaqstanda 10 jylǵa sozylǵan on sý jobasynyń qurylysy qaıta bastaldy
ASTANA. KAZINFORM — Qazaqstanda 2010-2020 jyldary bastalyp, aıaqsyz qalǵan 10 sý sharýashylyǵy jobasynyń qurylysy qaıta jandandy. Sý resýrstary mınıstrligi qalǵan nysandardy aldaǵy eki jylda aıaqtap, paıdalanýǵa berýdi josparlap otyr. Bul týraly vedomstvonyń baspasóz qyzmeti málim etti.
Byltyr Sý resýrstary jáne ırrıgatsııa mınıstrliginiń Sý sharýashylyǵy komıteti gıdrotehnıkalyq nysandardy salý jáne rekonstrýktsııalaý boıynsha uzaq ýaqyt aıaqtalmaı qalǵan jobalardy iske asyrýdy aıaqtaý algorıtmin ázirledi.
Bul algorıtmge sáıkes, 2010-2020 jyldary bastalǵan, alaıda aıaqtalmaǵan 10 joba boıynsha qurylys-montaj jumystary qaıta jandanyp, jalǵastyrylyp jatyr. Olardyń qatarynda Qyzylorda jáne Túrkistan oblystaryndaǵy kanaldardy rekonstrýktsııalaý jáne jańǵyrtýǵa qatysty alty joba, sondaı-aq Aqmola oblysyndaǵy Preobrajenskıı gıdrotoraby men Sileti sý qoımasyn, Abaı oblysyndaǵy Qýsaq ózenindegi bóget gıdrotorabyn jáne Almaty oblysyndaǵy Súmbe ózenindegi sý alý qurylysyn rekonstrýktsııalaý jobalary bar.
Mınıstrliktiń dereginshe, qazirgi ýaqytta Súmbe ózenindegi sý alý nysanynda jáne Túrkistan oblysyndaǵy Qyzylqum magıstraldyq kanalynda qurylys-montaj jumystary qaıta bastaldy. Túrkistan oblysyndaǵy K-26 jáne K-28 kanaldary boıynsha konkýrs rásimderi bastaldy. Taǵy tórt joba «Memsaraptama» RMK-nyń qaraýynda. Qalǵan eki jobaǵa túzetý engizý jumystary júrgizilip jatyr.
— Sý resýrstary jáne ırrıgatsııa mınıstrligi qurylǵannan beri sý sharýashylyǵy nysandaryn salý jáne rekonstrýktsııalaý boıynsha uzaq ýaqyt aıaqtalmaı qalǵan jobalardyń sany eki esege jýyq qysqardy. Eger 2020-2022 jyldary Sý sharýashylyǵy komıtetiniń teńgeriminde osyndaı 19 joba bolsa, búginde olardyń sany 10-ǵa deıin azaıdy. Qalǵan jobalardy aldaǵy eki jyl ishinde aıaqtap, paıdalanýǵa berý josparlanyp otyr, - dedi Sý resýrstary jáne ırrıgatsııa mınıstrligi Sý sharýashylyǵy komıteti tóraǵasynyń mindetin atqarýshy Nurbek Serikov.
