Qazaqstanda 10 mlrd teńgeniń esirtkisi tárkilendi
ASTANA. QazAqparat - QR Іshki ister mınıstriniń birinshi orynbasary Marat Demeýov ІІD jáne esirtki bıznesimen kúres bólimsheleriniń basshylarymen «Kóknár-2017» jedel aldyn alý sharasynyń qorytyndysyna arnalǵan jıyndy beıne baılanys arqyly ótkizdi, dep habarlaıdy QazAqparat.
QR ІІM baspasóz qyzmetiniń málimetinshe, elimizdiń aýmaǵynda quramynda esirtki zattary bar ósimdik ósetin Shý alqaby ornalasqan. Bul óńir qarasorany jınap, óńdeý respýblıka aýmaǵyna taratýǵa umtylatyn qylmystyq toptardy ózine tartady. Munan bólek, Qyzylorda oblysynda «úndi qarasorasy» ósedi.
Shara barysynda QR ІІM Esirtki bıznesimen kúres departamenti bastyǵynyń orynbasary Janat Bıtenov quramynda esirtki zattary bar ósimdikterdi daıyndaýdyń jolyn kesý, «aýǵan» esirtkisiniń tasymal arnalaryn joıý, esirtki satýmen, tasymaldaýmen aınalysatyn qylmystyq toptardyń áreketine tosqaýyl qoıý jumystary jaıynda esep berdi. Arnaıy ótkizilgen sharaǵa polıtsııanyń arnaıy bólimsheleri, Ulttyq ulannyń, UQK-niń jáne QR qarjy mınıstrligi Memlekettik kirister komıtetiniń ókilderi qatysty.
«Kóknár-2017» sharasyn ótkizý barysynda 130 tonna esirtki zattary, onyń ishinde 90 tonna arnaıy ósirilgen qarasora, 28 tonna jabaı ósken qarasora, 138 tonna gashısh pen 28 tonna geroın tárkiledi. Esirtki bıznesin jolǵa qoıǵan 5 qylmystyq toptyń áreketine tosqaýyl qoıyldy. Máselen, Reseı azamatynan Shý óńirinde 1 tonnadan astam marıhýana tárkilense, Pavlodarda júk kóliginiń jasyryn ornynan 180 keli marıhýana tabyldy. Tolyqtaı alǵanda, 30 mln ret qoldanýǵa bolatyn kólemde túrli esirtki zattary zańsyn aınalymnan alynyp, 10 mlrd teńgeden astam qarjynyń kóleńkeli ekonomıkaǵa túsýine jol berilmedi.
