Qazaqstanda 10 myń jumysshyǵa 7 robottan keledi — Mınıstr muny tómen kórsetkish dep atady
ASTANA. KAZINFORM — Qazaqstannyń mashına jasaý salasy jańa kezeńge qadam basty: óndiristerde robottandyrý qarqyn alyp, jasandy ıntellekt pen tsıfrlyq sheshimder belsendi engizilip keledi. Degenmen, eldegi robottandyrý deńgeıi áli de tómen — 10 myń jumysshyǵa nebári 7 robottan keledi. Bul týraly Úkimet otyrysynda Ónerkásip jáne qurylys mınıstri Ersaıyn Naǵaspaev aıtty.
Onyń aıtýynsha, mashına jasaý salasyndaǵy ınnovatsııany damytýdyń basty baǵyttarynyń biri – óndiristi robottandyrý.
— Qazirde elimizde 10 myń jumysshyǵa 7 robottan keledi, bul damyǵan elderden áldeqaıda tómen. Osyǵan baılanysty óndiriste robottandyrýdy damytý jáne kadr tapshylyǵyn azaıtý maqsatynda tsıfrlyq sheshimderdi engizý jumystary belsendi júrgizilýde. Onyń ishine avtomattandyrylǵan óndiristi basqarý júıesi, derekterdi taldaý, jasandy ıntellekt, tsıfrlyq platformalar, ónerkásiptik robottar men machine vision júıeleri kiredi, — dedi Ónerkásip mınıstri.
Ótken jyly óndiristerde FANUC jáne ABB robottaryn qosa eseptegende 300-den astam robot ornatylǵan.
Mysal retinde KIA Qazaqstan zaýytynda 68 robot, Astana Motors-ta 54 robot jumys isteıdi.
Sonymen birge, Jasandy ıntellekt jáne tsıfrlyq damý mınıstrligimen birlesip, «Digital Kazakhstan» jalpyulttyq strategııasy aıasynda ekonomıka salalaryn robottandyrý boıynsha jobalyq ofıs qurý josparlanyp otyr.
Aıta keteıik, eldegi kásiporyndardyń ınnovatsııaǵa jumsaǵan shyǵyny tórt jarym esege ósip, 1,9 trıllıon teńgege jetti. Tereńde ornalasqan, dástúrli ádistermen anyqtalmaıtyn jasyryn ken oryndaryn izdeý úshin ınnovatsııalyq geohımııalyq ádis engizilip jatyr.
Sońǵy bes jylda taý-ken salasynyń iri kásiporyndary ǵylymı-zertteý jáne tájirıbelik-konstrýktorlyq jumystarǵa 150 mıllıard teńge ınvestıtsııa salyp, 1,5 myńnan astam jobany iske asyrǵan.
