Qazaqstanda 10 mıllıon adam Sputnik V vaktsınasyn almaq

NUR-SULTAN. QazAqparat – Qazaqstanda 10 mıllıon adamǵa reseılik vaktsına egý josparlanyp otyr. Bul týraly Ortalyq kommýnıkatsııalar qyzmetinde ótken brıfıngide aıtyldy, dep habarlaıdy QazAqparat tilshisi.

Alekseı Tsoı atap ótkendeı, búgingi kúni reseılik Sputnik V vaktsınasynyń 2 mıllıon dozasyn alý týraly kelisim bar. Onyń aıtýynsha, vaktsına Qaraǵandy farmatsevtıkalyq zaýytynyń bazasynda shyǵarylady.

«2 mıllıon doza kepildendirilgen. Qazirgi ýaqytta biz qosymsha jabdyqtaý týraly kelissózder júrgizip jatyrmyz. Jalpy, biz 10 mıllıonǵa jýyq adamǵa vaktsına egýdi josparlap otyrmyz. bul halyqtyń 55%-y. Biz halyqtyń osal toptaryn anyqtadyq, olardyń kóbi adamdarmen baılanysta, ásirese naýqastarmen tikeleı baılanysta bolady. Ázirge bul kategorııaǵa 18-60 jas aralyǵyndaǵy adamdar kiredi. Qazir zertteýdiń sońǵy kezeńderi týraly málimetter jarııalanyp jatyr, eger osy jas aralyǵy keńeıtilse, biz vaktsına alýshylardyń sanyn keńeıte alamyz», - deıdi QR Densaýlyq saqtaý mınıstri Alekseı Tsoı.

Mınıstr reseılik vaktsına aqpan aıynyń úshinshi jartysynda tirkeletinin aıtty.

«Aldaǵy ýaqytta vaktsına Qazaqstannyń aımaqtaryna jetkiziledi jáne vaktsına egýdi bastaı alamyz. Aldyn ala boljam boıynsha, qazaqstandyq vaktsına bizge naýryz aıynda kelýi kerek, sol kezden bastap biz de egýdi kezeń-kezeńimen júzege asyra bastaımyz», - deıdi ol.