Qazaqstanda 10 medıtsına kolledjine qoldanbaly bakalavrıat baǵdarlamasy engiziledi
Sharaǵa qatysýshylar Qazaqstan men Fınlıandııanyń joǵarǵy bilikti medıtsınalyq kadrlardy daıyndaýdaǵy, olardyń densaýlyq saqtaý salasyndaǵy róli, alǵashqy medıtsınalyq-sanıtarlyq kómek qyzmetin tıimdi úıymdastyrý salasyndaǵy yntymaqtastyq máselelerin talqylady.
Eljan Birtanov halyqaralyq standarttar negizinde medıtsınalyq kadrlardy onyń ishinde meıirgerlik is mamandaryn daıarlaý júıesin jetildirý - Qazaqstan halqyna kórsetiletin medıtsınalyq kómek sapasyn arttyrýǵa múmkindik beretinin atap aıtty.
Dóńgelek stol aıasynda «Orta medıtsınalyq qyzmetkerler men farmatsevterdi daıarlaý men qaıta daıyndaý respýblıkalyq kolledji» RMQK dırektory Naılıa Rýzdenova, Astana ákimdiginiń «Medıtsınalyq kolledj» MQKQ dırektory Aqbala Sarjanova, JAMK qoldanbaly ǵylymdar ýnıversıteti basqarmasynyń basshysy Aıla Palonıemı men Lahti qoldanbaly ǵylymdar ýnıversıteti basqarmasynyń basshysy Karı Salmı densaýlyq saqtaý salasy men meıirgerlik isti damytý boıynsha ózara túsinistik pen strategııalyq yntymaqtastyq týraly Memorandýmǵa qol qoıdy.
Atalǵan qujat taraptardyń kelesi baǵyttar boıynsha yntymaqtastyǵyn qarastyrady: medıtsınalyq bilim berý uıymdaryndaǵy menedjmentti jetildirý; bilim berý baǵdarlamalarynyń tıimdiligi men pedagog kadrlardyń áleýetin arttyrý jáne aqparattyq, materıaldyq-tehnıkalyq resýrstardy jetildirý.
Buryn habarlanǵandaı, Qazaqstannyń 10 medıtsınalyq kolledji, onyń ishinde 2016 jyly 6, 2017 jyly 4 oqý orny joǵarǵy medıtsınalyq kolledj bolyp qaıta qurylady. Atalǵan oqý oryndarynda fın sarapshylarynyń qatysýymen ázirlengen «Meıirgerlik is» mamandyǵy boıynsha qoldanbaly bakalavrıat baǵdarlamasy engizilmek.
QR Densaýlyq saqtaý jáne áleýmettik damý mınıstrligi (ári qaraı - QR DSÁDM) «Meıirgerlik is» mamandyǵy boıynsha qoldanbaly bakalavrıatty engizý boıynsha jobany júzege asyrýdy 2014 jyly eksperımentaldy tártipte 6 memlekettik medıtsınalyq kolledj bazasynda (Astana qalasynyń medıtsınalyq kolledji, Kókshetaý medıtsınalyq kolledji, Qyzylorda medıtsınalyq kolledji, Pavlodar medıtsınalyq kolledji, Respýblıkalyq orta medıtsınalyq jáne farmatsevtıka qyzmetkerlerin daıyndaý men qaıta daıarlaý kolledji, Batys Qazaqstan medıtsınalyq kolledji) bastady.
QR Densaýlyq saqtaý salasyn damytýdyń 2016-2019 arnalǵan «Densaýlyq» memlekettik baǵdarlamasyn júzege asyrý aıasynda QR DSÁDM mamandary JAMK jáne Lahti (Fınlıandııa) qoldanbaly ǵylymdar ýnıversıtetteriniń áriptesterimen birlese otyryp QR-daǵy meıirgerlik bilim berý júıesin jetildirýdiń 2016-2019 jyldarǵa arnalǵan jol kartasyn jasady.
Qoldanbaly bakalavrıat baǵdarlamasy eýropalyq dırektıvalarǵa saı dýaldy bilim berý qaǵıdalaryn qarastyrady. Onyń ishinde oqý saǵattarynyń 60-70%-dan kem emes (oqý merzimi 3,5 jyl) kóleminde bilikti tálimgerdiiń basshylyǵymen emhanalyq bazada óndiristik praktıkany júzege asyrý da bar. Atalǵan baǵdarlama EýroOdaq elderinde keńinen taralǵan, sonymen qatar, praktıkalyq ázirligi basym joǵary bilikti meıirgerlerdi daıyndaýǵa baǵyttalǵan.
«Meıirgerlik is» mamandyǵy boıynsha qoldanbaly bakalavrıat joǵarǵy medıtsınalyq kolledj túlekteri aýrýlardy dárigerge deıingi tekserý, aldyn ala dıagnoz qoıý, beıindi mamandaryna konsýltatsııaǵa baǵyttaý, balalar jáne eresek turǵyndar patronajy, dárigerdiń baqylaýymen dárilik taǵaıyndaýlardy jazý syndy meıirgerlik qabyldaý úshin kásibı mashyqtardy ıgerip shygady.
Bıyl fın jáne otandyq mamandar «Meıirgerlik is» mamandyǵy boıynsha qoldanbaly bakalavrıattyń biriktirilgen baǵdarlamasyn ázirledi. Atalǵan baǵdarlama boıynsha budan buryn bilim alǵan meıirgerler bir jarym jyldyń ishinde qosymsha oqý arqyly óz kásibı mashyqtaryn damyta alady.
Biriktirilgen baǵdarlama boıynsha oqytý eksperımentaldy tártipte joǵaryda atalǵan 6 medıtsınalyq kolledjde 2016 jylǵy qyrkúıek aıynan bastaldy. Baǵdarlama boıynsha 150 adam (árbir kolledjde 25 orynnan) tegin oqytylmaq.
Esterińizge sala keteıik, qazirgi tańda Qazaqstanda 26 memlekettik jáne 37 jeke medıtsınalyq kolledj bar. Olar jyl saıyn orta eseppen 12 myń orta býyn medqyzmetker daıyndaıdy. Búginde orta medpersonal sala qyzmetkerleriniń eń kóp sanatyn quraıdy, oradyń sany shamamen 160 myń maman.