Qazaqstanda 10 kolledj kásiporyndardyń basqarýyna berildi

ASTANA. QazAqparat - Ulttyq kásipkerler palatasynyń Tehnıkalyq jáne kásibı bilim berý salasynyń mamandary Germanııanyń Trır qalasynan kelgen Qolóner palatasynyń sarapshylarymen kezdesti. Áńgime barysynda Qazaqstandaǵy dýaldi oqytý júıesin jetildirý jaıy talqylandy.

Ulttyq kásipkerler palatasy tóraǵasynyń orynbasary Nurjan Áltaevtyń aıtýynsha, Qazaqstanda kadrlyq másele óte ózekti. Jumysshylardy daıyndaý sapasy áli de kásiporyn ıeleriniń suranysyna jaýap bere almaıdy.

«Kásipkerler jańa jabdyqtar, jańa kásiporyndar, jańa zaýyttar salady, biraq jergilikti eńbek naryǵynda olardy ıgeretin jumysshylardy tappaı álekke túsedi. Jańa jobalarǵa shetelden mamandardy tartýǵa májbúrmiz. Bilim berý júıesi, ásirese tehnıkalyq jáne kásibı bilim berý salasy óndiriske qajetti mamandardy daıarlaýda qalys qalyp keledi», - dedi ol.

UKP men Trır qalasynyń Qolóner palatasy arasynda 2017 jylǵa deıin kásibı bilim berý salasynda seriktestik joba bary belgili. Ulttyq kásipkerler palatasy QR bilim jáne ǵylym mınıstrligimen de qarym-qatynas ornatqan. Osy «úshtik odaqtyń» arqasynda Qazaqstannyń birqatar aımaqtarynda dýaldi oqytý júıesi engizilip, óziniń tıimdiligin kórsetýde.

«Kóptegen oblystardan UKP-na mamandardy daıarlaý boıynsha ótinishter kelýde. Byltyr biz 12 myń maman daıarlaý boıynsha ótinish aldyq jáne ol ótinishterdi kolledjderge ornalastyrdyq. Oǵan qosa, kásiporyndar kolledjderdi basqarýdy óz qoldaryna alady jáne oqý ornynynyń basshylyǵymen birge oqý baǵdarlamasyn da ózgertedi. Búginde 10 kolledj kásiporyndardyń qanatynyń astyna alynǵan. Óte jaqsy tájirıbe Qyzylorda jáne Ońtústik Qazaqstan oblystarynda jınaqtalǵan. Onda birneshe kásiporyn birigip, bir kolledjdi basqarýǵa aldy. Bilim baǵdarlamalary ózgertilip, stýdentterdiń tájirıbe alýǵa joldary ashyldy», - dep atap ótti N. Áltaev.