Qazaqstanda 10 aıda óndirilgen munaıdyń 55 paıyzy Atyraý oblysyna tıesili
«Memleket basshysy Qasym-Jomart Toqaevtyń bıylǵy Joldaýynda elimizdiń jáne óńirdiń órkendeýine qatysty naqty tapsyrmalar kórsetilgen. Bizdiń basty maqsatymyz - naqty júktelgen mindetterdi tabysty júzege asyrý. Atalǵan baǵyttar boıynsha Atyraý oblysynda irgeli jumystar jasalyp jatyr. Oblystyń jalpy óńirlik ónimi osy jyldyń qańtar-maýsymynda 3 trln 930 mlrd teńgeni qurady. Naqty kólem ındeksi - 102,2 paıyz. Al respýblıkanyń jalpy ishki ónimi kólemindegi oblystyń úles salmaǵy - 14 paıyz. Jan basyna shaqqandaǵy jalpy óńirlik ónim - 6 mln teńge», - dedi óńir basshysy Ortalyq kommýnıkatsııalar qyzmetindegi baspasóz máslıhatynda.
Osy rette ol Atyraý óńiriniń ekonomıkalyq ózegi munaı-gaz sektory ekenin basa aıtty.
«Oblystaǵy ónerkásiptik ónimdegi onyń úlesi 88 paıyzdy quraıdy. Bıyl 10 aıda 39 mln 300 myń tonna munaı óndirildi. Bul Qazaqstanda óndirilgen jalpy munaı kóleminiń 55 paıyzy degen sóz. Oblysta munaı-gaz salasy boıynsha birqatar aýqymdy joba júzege asyrylyp jatyr. Solardyń eń irisi - keleshekte Teńiz ken ornyn keńeıtý jobasy. Onyń jalpy quny 46 mlrd dollar. Bul joba munaı óndirýdi jylyna 12 mln tonnaǵa arttyrýǵa múmkindik beredi»,- dedi Mahambet Dosmuhambetov.
Oblys basshysynyń aıtýynsha, Teńiz ken ornyn keńeıtý jobasyna úsh júzge jýyq qazaqstandyq kompanııa jumyldyrylǵan. Qazir 27 myń adam jumys istep jatqan irgeli jobany 2020 jyly iske qosý josparlanyp otyr.
«Jobanyń 80 paıyzy daıyn. Munaı-gaz salasyndaǵy taǵy bir aýqymdy joba Qashaǵannyń da mańyzy kúnnen kúnge artyp keledi. Onda osy jyldyń 10 aıynda 12 mln 700 myń tonna munaı óndirildi», - dedi Atyraý oblysynyń ákimi.
