Qazaqstanda 10 adamnyń úsheýi ǵana qarjylyq jaǵdaıyna qanaǵattanady

NUR-SULTAN. QazAqparat – 10 qazaqstandyqtyń úsheýi ǵana óziniń qarjylyq jaǵdaıyna tolyq qanaǵattanady. Mundaı derekti ranking.kz portaly usyndy, dep habarlaıdy QazAqparat tilshisi.

Jyl saıyn naýryz aıynda ótkiziletin halyqtyń ómir sapasyn zertteýge sáıkes, qarjylyq jaǵdaıyna tolyqtaı qanaǵattanatyn qazaqstandyqtardyń úlesi ekinshi jyl qatarynan qysqaryp keledi.

Bir jyl buryn mundaı respondentterdiń úlesi 40,2 paıyz bolsa, bıyl 32,1 paıyzdy qurap otyr.

Degenmen, qarjylyq jaǵdaıyna jartylaı qanaǵattanatyndardyń úlesi jyl ishinde 56,3-ten 64 paıyzǵa deıin ósken.

Al qarjylyq jaǵdaıyna qanaǵattanbaıtyn respondentter úlesi (0,6%) jyl ishinde ózgerissiz qalyp otyr.

Saýalǵa jaýap berýge qınalǵandardyń úlesi 3,3 paıyzdy quraıdy.

Otbasynyń ekonomıkalyq jaǵdaıyna tolyqtaı qanaǵattanatyn respondentter úlesi de jyl ishinde 44,1-den 34,7 paıyzǵa azaıǵan.

Jartylaı qanaǵattanatyndar úlesi 52,8-den 63 paıyzǵa ósken.

Al otbasynyń ekonomıkalyq jaǵdaıyna qanaǵattanbaıtyn respondentter úlesi jyl ishinde 1,1-den 0,5 paıyzǵa tómendese, respondentterdiń 1,8 paıyzy saýalǵa jaýap berýge qınalǵan.

Turǵylyqty jerdi alyp qaraǵanda, qalalyqtarǵa (30,6%) qaraǵanda aýyl turǵyndary (34,8%) qarjylyq jaǵdaıyna tolyq qanaǵattanady.

Qarjylyq jaǵdaıyna qanaǵattanbaıtyndardyń arasynda da aýyl turǵyndaryna (0,4%) qaraǵanda qalalyqtar (0,7%) basym.

Sonymen qatar áıelderge (29,5%) qaraǵanda qarjylyq jaǵdaıyna tolyq qanaǵattanatyn erlerdiń (35,9%) úlesi kóp.

Bir qyzyǵy qarjylyq jaǵdaıyna qanaǵattanbaıtyn erler men áıelderdiń úlesi teń - 0,6 paıyz.