Qazaqstanda 10,5 myń adam týberkýlezden emdelip jatyr

ASTANA. QazAqparat – Elimizde 10,5 myń adam týberkýlezden emdelip jatyr. Mundaı derek Premer-Mınıstrdiń orynbasary – Eńbek jáne halyqty áleýmettik qorǵaý mınıstri Tamara Dúısenovanyń Májilis depýtattary saýalyna berilgen jaýabynda keltirilgen, dep habarlaıdy QazAqparat tilshisi.

«2023 jylǵy 1 shildedegi jaǵdaı boıynsha týberkýlezden 10 587 adam emdelýde, onyń ishinde 7987 patsıent ambýlatorııalyq kómek alýda. Bul 75 paıyzdy quraıdy. Patsıentter týberkýlezge (15 ataýy boıynsha) jáne zeńge qarsy preparattarmen, vıtamındermen, gepatoprotektorlarmen tolyq kólemde qamtamasyz etiledi. Týberkýlezge qarsy preparattardy qabyldaý kezinde jaǵymsyz qubylystardyń aldyn alý maqsatynda olardy qabyldaǵannan keıin kún saıyn patsıentterdiń jaı-kúıine monıtorıng júrgiziledi jáne aı saıyn zerthanalyq-dıagnostıkalyq zerttep-qaraý júrgiziledi», - dedi Tamara Dúısenova jaýabynda.

Onyń atap ótýinshe, týberkýlezge qarsy preparattardy qabyldaýǵa asqynýlar nemese jaǵymsyz qubylystar anyqtalǵan jaǵdaıda, ambýlatorııalyq emdeýdegi patsıentter densaýlyq jaǵdaıy men áleýmettik jaǵdaılardy eskere otyryp, ftızıopýlmonologııa ortalyqtaryna jatqyzylady ne jaǵdaıy turaqtanǵanǵa deıin tegin medıtsınalyq kómektiń kepildik berilgen kólemi aıasynda medıtsınalyq-sanıtarııalyq alǵashqy kómek uıymdarynyń kúndizgi statsıonarlarynda statsıonardy almastyratyn em alady.

«Týberkýlez profılaktıkasy jónindegi is-sharalardy júrgizý qaǵıdalaryna sáıkes (2020 jylǵy 30 qarashadaǵy № QR DSM-214/2020 buıryǵymen bekitilgen) ambýlatorııalyq emdeýdegi týberkýlezben aýyratyn naýqastar ftızıopýlmonologııa ortalyǵynyń ortalyqtandyrylǵan dárigerlik-konsýltatıvtik komıssııasynyń sheshimi boıynsha jumysqa nemese oqýǵa jiberiledi. Sonymen qatar ambýlatorııalyq emdelip jatqan týberkýlezben aýyratyn adamdar jergilikti bıýdjetten barlyq jerde derlik áleýmettik kómek alady. 2022 jyly áleýmettik kómek kólemi 2 mlrd teńgeni qurady», - dedi mınıstr.