Qazaqstanda 10-11 synyp oqýshylaryna kolledjde qatar oqý múmkindigin berý usynyldy
ASTANA. KAZINFORM – Elimizde 11-synyp bitirgen túlekterdiń 50 myńy qaıtadan kolledjderge túsedi jáne bir pándi qaıtalap oqýǵa májbúr. Bul týraly Májilis depýtaty Ashat Aımaǵambetov aıtty.
«10-11 synyp oqýshylaryna óz tańdaýy boıynsha mekteptegi oqýymen birge kolledjderde paralleldi túrde oqýǵa múmkindik berý usynylady. Mysaly aýyldarda bala túske deıin bir aýysymdy mektepte oqıdy, al tústen keıin – kolledjerde qosymsha mamandyq alyp shyǵýǵa múmkindik berýshi edik. Búginde 11-synyp bitirgenderdiń 50 myńy qaıtadan kolledjderge túsedi, taǵy da sol pánderdi qaıtalap oqıdy. Sondyqtan bizdiń oıymyzsha kolledjderde parallel oqýǵa múmkindik berý aqshany da, balanyń ýaqytyn da tıimdi jumsaýǵa múmkindik beredi jáne mektepti bitirgende attestatpen qatar, naqty biliktiligi bar dıplom alyp shyǵady», - dedi Ashat Aımaǵambetov Májiliste «Qazaqstannyń eńbek naryǵyn damytý jáne kadrlyq áleýetin nyǵaıtý» atty Úkimet saǵatynda.
Kolledjder boıynsha qazir ár óńir óz qajettiligin ózi anyqtap, memlekettik tapsyrysty ózderi ornalastyrady. Oǵan jalpy monıtorıng júrgizilmeıdi. A. Aımaǵambetov kolledjder boıynsha biryńǵaı bilim berý tapsyrysyn qalyptastyrý men jedel basqarýdy Oqý-aǵartý mınıstrligine tikeleı berý máselesin qarastyrýdy usyndy.
«Kolledjder janyndaǵy oqý-óndiristik kombınattar tájirıbesin qaıta bastaý qajet. Biraq mektepter janynda olardy ashý múmkin emestigin túsiný kerek, oǵan ǵımarat ta, qarajat ta joq.
Al kolledjderdiń áleýetin paıdalaný ábden múmkin. Osy jobany engizip, mektepter men kolledjder arasyndaǵy ózara baılanysty ornatý qajet.
Kolledjderdiń materıaldyq-tehnıkalyq jabdyqtalýyn aıaqtaý qajet, «Jas maman» jobasy aıasynda 180 kolledj jabdyqtaldy, endi taǵy 180 kolledjdi aıaqtaǵan jón. Kolledjdegi granttyń qunyn aıtarlyqtaı ulǵaıtý qajet, jáne bir stýdentti oqytý qunynyń ádistemesinde praktıkalyq jumysqa, shyǵyn materıaldaryna jáne jabdyqtarǵa jumsalatyn shyǵyndardy eskerý kerek», - dedi A. Aımaǵambetov.
Sonymen birge, naqty kásiporynnyń ózine maqsatty bilim granttaryn berý tájirıbesin engizý usynyldy.
«ıAǵnı grant jumys berýshiniń ózine beriledi, ol bolashaq jumysshylaryn — kásiporynnyń ózi tańdaıdy. Óz kezeginde jumys berýshi túlekti jumysqa ornalastyrý týraly kepildeme beredi, dýaldi oqytýdaǵy praktıka ornyn, bilim berý baǵdarlamasyn ázirleýge qatysýdy da kepildeıdi.
Al biz ol stýdentterdi oqýyn aıaqtaǵannan keıin osy kásiporynda jumys isteý mindetin zańnamalyq túrde engizýdi josparlap otyrmyz», - dedi Májilis depýtaty.
Buǵan deıin Májilis depýtaty eldegi jumyspen qamtý sharalarynyń tıimdi bolmaǵanyn synaǵan edi.
Sondaı-aq, Qazaqstanda «jumys isteıtin kedeıler» fenomeni beleń alǵanyn aıtýda.
