Qazaqstanda 1 tamyzdan bastap gıdter men ekskýrsııa jetekshileri jańa qaǵıdamen jumys isteıdi
ASTANA. KAZINFORM – Qazaqstanda gıdter, ekskýrsııa jetekshileri jáne týrızm nusqaýshylarynyń qyzmetin retteıtin jańa qaǵıdalar bekitildi. Tıisti buıryqqa Týrızm jáne sport mınıstri qol qoıdy.
Qujatqa sáıkes, bul qyzmetpen Qazaqstan Respýblıkasynyń azamattary ǵana aınalysa alady. Ol úshin qyzmetiniń bastalǵany týraly eLicense.kz portaly arqyly habarlama joldaýy qajet. Osy habarlama negizinde týrızm salasyndaǵy ýákiletti organ gıdterdiń, ekskýrsııa jetekshileriniń jáne týrızm nusqaýshylarynyń memlekettik elektrondyq tizilimin júrgizedi.
Tizilim Týrızm jáne sport mınıstrliginiń resmı saıtynda, sondaı-aq ishki jáne kelý týrızmin damytý maqsatynda Úkimet qurǵan uıymnyń resmı ınternet-resýrsynda jarııalanady.
Týrıstik qyzmet týrıstpen jasalǵan shart negizinde kórsetiledi. Shartty rásimdeý úshin týrıst ózi jáne shart jasalatyn basqa adamdar týraly málimet beredi.
Sapar bastalǵanǵa deıin keminde úsh kún buryn gıdter, ekskýrsııa jetekshileri jáne týrızm nusqaýshylary týrısterge sapardyń erekshelikteri týraly jazbasha aqparat berýge mindetti.
Atap aıtqanda, olar týrısterdi baratyn elge nemese óńirge kirý jáne onda bolý tártibimen, jergilikti zańnamamen, halyqtyń salt-dástúrimen, dinı erekshelikterimen, tabıǵı, tarıhı jáne mádenı mura nysandarymen, qorshaǵan ortanyń jaı-kúıimen, sondaı-aq sapar barysynda týyndaýy múmkin qaýipter týraly aldyn ala habardar etýi tıis. Budan bólek, týrısterdiń qaýipsizdigin qamtamasyz etýge qajetti sharalardy qabyldaýǵa mindetti.
Eger týrıst tótenshe jaǵdaıǵa tap bolsa, gıd, ekskýrsııa jetekshileri nemese týrızm nusqaýshysy bul týraly bir jumys kúni ishinde týrızm salasyndaǵy ýákiletti organǵa, azamattyq qorǵaý organdaryna jáne týrıstiń otbasy múshelerine habarlaýǵa mindetti. Eger zardap shekken adam shetel azamaty bolsa, bul jóninde dıplomatııalyq ókildikterge de habar beriledi.
Ómir men densaýlyqqa qaýip tóndirýi múmkin marshrýttar boıynsha sapar uıymdastyrylǵan jaǵdaıda gıdter men týrızm nusqaýshylary týrısten yqtımal qaýipter týraly habardar bolǵanyn rastaıtyn kelisim alýǵa mindetti.
Jańa qaǵıdada gıdterdiń, ekskýrsııa jetekshileriniń jáne týrızm nusqaýshylarynyń mindetteri de naqty ajyratylǵan.
Gıdter men týrızm nusqaýshylary týrıstiń saparǵa daıyndalýyna jáne marshrýt boıymen júrýine baılanysty uıymdastyrýshylyq qyzmet kórsetedi, sondaı-aq onyń basqa qyzmettermen ózara baılanysyn úılestiredi. Bul rette olar týrıstik ónimdi qalyptastyrýmen, jarnamalaýmen jáne satýmen aınalyspaıdy.
Al ekskýrsııa jetekshileri týrıster ýaqytsha bolatyn jerde týrıstik nysandarǵa tanymdyq ekskýrsııalar uıymdastyrady. Mundaı ekskýrsııalar týrısterdi ornalastyrý nemese túneý qyzmetin qamtymaıdy jáne uzaqtyǵy 24 saǵattan aspaıdy.
Buıryq 2026 jylǵy 1 tamyzdan bastap qoldanysqa engiziledi.
Eske salaıyq, buǵan deıin Qazaqstanda gıdterdiń kásibı mártebesin rastaıtyn QR-kody bar elektrondy beıdj engizilgeni habarlanǵan bolatyn. Beıdj arqyly týrıst mamannyń resmı tirkelgenin teksere alady.
