Qazaqstanda 1-synypqa qabyldaý bastaldy: 13 myńnan astam elektrondy ótinish tústi

NUR-SULTAN. QazAqparat - Balalardy 1-synypqa qabyldaý úshin 13 myńnan astam elektrondy ótinish tústi. Qabyldaýdyń birinshi kúni, ıaǵnı jumada 10 myń, búgin jumys kúni bastalǵaly beri taǵy 3 myń ótinish tústi, dep habarlaıdy QR BǴM baspasóz qyzmeti.

Eske sala keteıik, azamattarǵa yńǵaıly bolýy úshin balalardy mektepke qabyldaý qyzmeti avtomattandyrylǵan. Bul jumys egov.kz veb-portaly arqyly júzege asyrylady.

Balalardy 1-synypqa qabyldaý úshin qujattardy 1 sáýirde bastap, 2022 jylǵy 1 tamyzǵa deıin tapsyrýǵa bolady.

«Biz azamattarǵa kórsetiletin barlyq qyzmetti avtomattandyrýǵa basa nazar aýdaramyz. UBT, barlyq deńgeıdegi olımpıada elektrondy formatqa kóshirildi. Munyń kóptegen artyqshylyǵy bar, eń bastysy - barlyq protsestiń ashyqtyǵy. Biz ashyqtyqty jáne azamattarǵa qolaıly jaǵdaı jasaýdy qoldaımyz. Qujattardy qabyldaýdyń birinshi kúniniń ózinde egov.kz portaly arqyly 10 myńnan astam elektrondy ótinish kelip tústi. Mundaı sandar QR BǴM-niń tsıfrlyq memlekettik qyzmetteri azamattar arasynda tanymal ekendigin kórsetedi», - deıdi Bilim jáne ǵylym vıtse-mınıstri Aıbat Іlııasov.

Aıta keteıik, 1-synypqa balalardy qabyldaý ata-anasynyń nemese bilim alýshynyń zańdy ókiliniń jeke ótinishi negizinde qabyldanady.

Sondaı-aq mynadaı qujattar qajet: balanyń týý týraly kýáliginiń kóshirmesi; 026/ý-3 nysanyndaǵy densaýlyq jaǵdaıy týraly qujat; 065/ý nysanyndaǵy densaýlyq jaǵdaıy týraly qujat jáne oqýshynyń ólshemi 3h4 bolatyn eki fotosýreti (oqýǵa qabyldaýdyń Úlgilik qaǵıdalarynda QR BǴM 2018 jylǵy 12 qazandaǵy №564 buıryǵyna sáıkes balalardy mektepke qabyldaý tártibi aıqyndalǵan).