Qazaqstanda 1 shildeden bastap aýlalarǵa kólik qoıýǵa tyıym salyna ma - mınıstrlik jaýaby
ASTANA. KAZINFORM – Ónerkásip jáne qurylys mınıstrligi 2026 jylǵy 1 shildeden bastap turǵyn úılerdiń mańyna avtokólik qoıýǵa tyıym salynady degen aqparatty joqqa shyǵardy.
Birqatar buqaralyq aqparat quraldary men áleýmettik jelilerde 1 shildeden bastap Qazaqstanda turǵyn úılerdiń mańynda avtokólikterdi qoıýǵa tyıym salynady degen aqparat taraǵan.
«Atalǵan aqparat shyndyqqa sáıkes kelmeıdi. Mınıstrliktiń buıryǵynda turǵyn úılerdiń janynda avtokólikterdi qoıýǵa jańa tyıym salý kózdelmegen. Jańa qaǵıdalarda azamattarǵa arnaıy qarastyrylǵan avtoturaq oryndaryna kólik qoıýǵa tyıym salatyn normalar joq. Ózgerister tek qoldanystaǵy normalardy naqtylaý maqsatynda engizildi. Sondyqtan avtokólikterdi qoıýǵa qatysty jańa shekteýler engiziledi degen tujyrymdar qujattyń mazmunyna sáıkes kelmeıdi», – dep málimdedi mınıstrlik.
Vedomstvonyń túsindirýinshe, Ónerkásip jáne qurylys mınıstriniń «Qalalar men eldi mekender aýmaqtaryn abattandyrýdyń úlgilik qaǵıdalaryn bekitý týraly» buıryǵy normatıvtik quqyqtyq bazany QR Qurylys kodeksine sáıkestendirýge baǵyttalǵan.
Qujat eldi mekenderdi abattandyrý salasyndaǵy burynnan qoldanysta bolǵan normalardy qaıta bekitedi. Bul erejeler buǵan deıin de Ulttyq ekonomıka mınıstriniń 2015 jylǵy 20 naýryzdaǵy №235 buıryǵymen bekitilgen qaǵıdalarda qoldanylyp kelgen.
Mınıstrliktiń málimetinshe, ózgeristerdiń biri qaǵıdalardyń 32-tarmaǵyn naqtylaýǵa qatysty. Onda jeke turǵyn úılerge irgeles aýmaqta jınap, saqtaýǵa ruqsat etilmeıtin jyljymaly múliktiń tizbesi naqtylanǵan.
Buryn «ózge de jyljymaly zattar» degen jalpy tujyrym qoldanylsa, jańa redaktsııada oǵan avtokólik quraldary, tirkemeler men arbalar da jatatyny naqty kórsetilgen.
Alaıda bul norma kólik quraldaryn paıdalanýǵa nemese arnaıy belgilengen oryndarda qoıýǵa tyıym salmaıdy. Áńgime ortaq paıdalanýdaǵy aýmaqta múlikti uzaq ýaqyt saqtap qoıýǵa jáne úıip tastaýǵa jol bermeý týraly bolyp otyr.
Sondaı-aq mınıstrlik atalǵan qaǵıdalar jol qozǵalysyn uıymdastyrý, avtoturaqtar men turaq oryndaryn retteý jáne kólik quraldaryn paıdalaný máselelerin qamtymaıtynyn atap ótti.
Osyǵan baılanysty vedomstvo azamattardy tek resmı aqparat kózderine súıenýge jáne normatıvtik quqyqtyq aktilerge qatysty shyndyqqa janaspaıtyn túsindirmelerdi taratpaýǵa shaqyrdy.
Aıta keteıik, almatylyq ár júrgizýshige tegin turaq orny berilýi múmkin.
