Qazaqstanda 1 shildeden bastap sheteldik telearnalar efırinde jarnama kórsetýge tyıym salynady
Esterińizde bolsa, bul zań 2015 jylǵy qazan aıynyń sońynda qabyldanyp, 2016 jylǵy 1 qańtardan bastap qoldanysqa enýi qajet edi.
Alaıda, kabeldik operatorlar tarapynan normanyń iske asyrylý merzimin uzartýǵa qatysty kóptegen ótinishter túsip, memleket kabeldik operatorlardyń jaǵdaıyn túsinip, daıyndyq ýaqytyna jarty jyl berdi.
Mınıstr keltirgen málimetter boıynsha, osy ýaqyttyń ishinde sheteldik telearnalarmen tikeleı kelissózder júrgizilgen. Olardyń keıbireýi qazirdiń ózinde jarnamasyz kontentti usynyp otyr. Buǵan Viasat tobynyń reıtıngilik arnalaryn (TV 1000, Explore, History, Viasat Sport jáne t.b.) mysalǵa keltirýge bolady.
Discovery kompanııasymen júrgizilgen kelissózde de biz tıimdi nátıjelerge qol jetkizdik, ıaǵnı osy kompanııaǵa qarasty 15 arnanyń 13-i bizdiń elimizdiń Zańyn oryndaý úshin tıisti tehnıkalyq jabdyqtamany satyp aldy. Qalǵan eki arna Qazaqstan úshin arnaıy bólek nusqalaryn shyǵaratyn bolady.
Osyǵan qosa, jaqyn arada Qazaqstanda Discovery-dyń ókildigi ashylady.
Basqa sheteldik arnalarǵa keletin bolsaq, «Qazteleradıo», «Qazaqtelekom», «AlmaTV» sekildi elimizdiń iri kabeldik operatorlary efırden jarnamasy alyp tastalynǵan sheteldik telearnalar sıgnalyn jeńildikpen basqa operatorlarǵa usynýǵa daıyn.
Al, shaǵyn abonenttik bazalary bar kabeldik operatorlar bolsa 1 shildeden bastap otandyq zańnamanyń normalaryn oryndamaıtyn arnalardy óshirýge nemese aýystyrýǵa mindetteledi.
Árıne, tehnıkalyq jaǵynan da, kelissózder tarapynan da jekelegen qıynshylyqtar bar. Alaıda, bizdiń mınıstrlik Zańnyń barynsha qatań oryndalýyn jáne qazaqstandyq kórermenderge eshqandaı zııan keltirmeý úshin barlyq jaǵdaı jasaıdy.
Búginde ártúrli kabeldi jeliler arqyly 150 telearnany kórip otyrmyz, onyń ishinde 70% - sheteldik. Olarǵa elimizdiń «Teleradıohabar taratý týraly», «Til týraly», «Jarnama týraly» zańdarynda qarastyrylǵan kóp shekteýler qoıylmaıdy. Bundaı jaǵdaı otandyq telearnalar men sheteldik telearnalar arasynda teńsizdik ornatýda.
Budan basqa, kóptegen sheteldik arnalarda lıtsenzııalaý men sertıfıkattaýdan ótpegen nemese Qazaqstan naryǵynda tyıym salynǵan taýarlar men qyzmetterdiń jarnamasy (mysaly ishimdiktiń) kórsetiledi.
«Osylaısha, otandyq arnalar jarnamalyq naryq qarajatynyń qomaqty bóligin ala almaǵan. Bul aqshaǵa otandyq televızııanyń jaǵdaıyn jaqsartyp, ınfraqurylymdy damytyp, qyzyqty ári sapaly qazaqstandyq baǵdarlamalar, fılmder, serıaldar men shoýlar jasaýǵa bolar edi.
Biz júrgizip otyrǵan saıasat túsinistik taýyp, qazaqstandyqtardyń qoldaýyna ıe bolatynyna, jaqyn arada jaǵymdy nátıje beretinine senimdimin», delingen habarlamada.
