Qazaqstanda 1 myńǵa jýyq lombard tekseriletin bolady
ALMATY. QazAqparat – Qazaqstanda maýsymǵa deıin 1 myńǵa jýyq lombardtyń qyzmeti tekseriletin bolady, dep habarlaıdy QazAqparat tilshisi.
«QR Prezıdenti Qasym-Jomart Toqaevtyń tapsyrmalaryn júzege asyrý aıasynda shaǵyn qarjy uıymdary, lombardtar, onlaın kredıt kompanııalarynyń qyzmeti tekseriletin bolady. Sonymen qatar 23 naýryzdaǵy tapsyrmaǵa sáıkes halyqqa tutyný nesıelerin usynatyn bankke jatpaıtyn uıymdardyń qyzmeti baqylaýǵa alynady. Olardyń qyzmetiniń zańdylyǵy, qarjylyq pıramıda belgileriniń bar-joqtyǵy anyqtalady», - dedi onlaın brıfıng barysynda QR Qarjy naryǵyn damytý jáne retteý agenttiginiń basqarma tóraǵasynyń orynbasary Nurlan Ábdrahmanov.
Onyń aıtýynsha, tekserý jumystary Qazaqstannyń 17 qalasynda naýryzdan maýsymǵa deıin jalǵasady. Tekseriletin lombardtar men shaǵyn qarjy uıymdarynyń kópshiligi Nur-Sultan, Almaty, Shymkent qalalarynla ornalasqan.
Naýryzda Agenttik, QR ІІM, QR QM Memlekettik kirister komıtetiniń ókilderinen 39 tekserý toby quryldy.
«1100 lombardtyń 424-i – sáýirde, 323 – mamyrda, 353-i maýsymda tekseriledi. Sonymen qatar 50 jýyq onlaın nesıe berý uıymy, 200 shaǵyn qarjy uıymy tekseriledi», - dedi ol.
Eń aldymen reıd barysynda nesıesin óteý múmkindiginen aırylǵan ShOB sýbektileriniń tólemderin toqtatý týraly tapsyrma qanshalyqty oryndalyp jatqany anyqtalady.
Zań talaptaryn buzý derekteri anyqtalǵan bolsa olarǵa tıisti jaza qoldanylatyn bolady.
