Qazaqstanda 1 mln halyqqa 1 172 ǵalymnan keledi

NUR-SULTAN. QazAqparat – QR Bilim jáne ǵylym mınıstrligi Ǵylym komıtetiniń tóraǵasy Janna Qurmanǵalıevanyń aıtýynsha, sońǵy eki jylda eldegi jas ǵalymdardyń qataryna myńnan astam maman qosylǵan, dep habarlaıdy QazAqparat tilshisi.

Bul týraly ol ortalyq kommýnıkatsııalar qyzmetinde ótken brıfıngide aıtty.

«Búgingi tańda ǵylym salasynda 22 655 adam qyzmet etedi. 1 mln halyqqa 1 172 ǵalymnan keledi. Ǵylym salasynda sońǵy jyldary óte úlken túbegeıli ózgerister bolyp jatyr. Birinshi kezekte qarjylandyrý eki esedeı artty. Ǵylym týraly zańǵa jyldar boıy sheshilmeı kelgen máselelerdi sheshýge arnalǵan ózgerister engizildi. Ǵylymı uıymdardyń materıaldyq ahýaly kúrt tómendep ketken. Sol boıynsha úlken-úlken qomaqty sharalar qabyldanyp, jańa, zamanaýı zerthanalar, basqa qondyrǵylar satyp alyndy. Jalpy elimizdiń ǵylymı qyzmetkerleriniń jaǵdaıyna baılanysty úlken sharalar qabyldanyp, qazirgi tańda jas ǵalymdardyń sany sońǵy 2 jylda 1000 adamǵa ósti», - dedi komıtet basshysy.

Sondaı-aq, onyń aıtýynsha, pandemııa kezinde otandyq QazVac vaktsınasynyń paıda bolýy – eldegi ǵylymnyń basty jetistikteriniń biri.

«Búkil osy ózgerister Memleket basshysynyń tikeleı qoldaýymen, halyqqa arnalǵan Joldaýlarynda qoıylǵan úlken máselelerge baılanysty. Ǵylymda jetistikter de joq emes. Ózimizdiń vaktsınadan bastap qazirgi tańda 50-den astam úlken baǵdaralamalyq ǵylymı joba iske asty. Olardyń nátıjesi halyqtyń ál-aýqatyna oń áser etedi dep senýge negiz bar», - dedi Janna Qurmanǵalıeva.

Aıta keteıik, QR Premer-Mınıstri Eraly Toǵjanovtyń aıtýynsha, álemniń 43 eli qazaqstandyq QazVac vaktsınasyn alýǵa daıyn.