Qazaqstanda 1 mln gektardan astam aýyl sharýashylyǵy jeri memleket menshigine qaıtaryldy
ASTANA. KAZINFORM — Qazaqstanda paıdalanylmaı jatqan jáne zań talaptaryna sáıkes kelmeıtin 1 mln gektardan astam aýyl sharýashylyǵy maqsatyndaǵy jer memleket menshigine qaıtaryldy.
QR Aýyl sharýashylyǵy mınıstrliginiń Jer resýrstaryn basqarý komıteti bıyl nysanaly maqsaty boıynsha ıgerilmegen nemese jer zańnamasy talaptary buzylǵan 1 mln gektar jerdi qaıtarýdy josparlaǵan. Vedomstvonyń málimetinshe, bul jospar tolyq oryndaldy.
— Jerdi memleket menshigine qaıtarý jumystary paıdalanylmaı jatqan aýyl sharýashylyǵy alqaptaryn anyqtaý jáne jerdi tıimdi paıdalaný maqsatynda júrgizilip jatyr. Qaıtarylǵan jerlerdi qaıtadan sharýashylyq aınalymyna engizý, jer resýrstaryn utymdy paıdalaný jáne memlekettik baqylaýdy kúsheıtý kózdelip otyr, — delingen habarlamada.
Jer zańnamasynyń saqtalýyn qamtamasyz etý baǵytyndaǵy jumystar aldaǵy ýaqytta da jalǵasady.
Aıta keteıik, 2022 jyldan beri Qazaqstanda jalpy kólemi 15,4 mln gektar jer memleket menshigine qaıtarylǵan.
Eske salaıyq, buǵan deıin Almatyda burynǵy temirjol aýrýhanasy men jer ýchaskeleri memleketke qaıtarylǵanyn habarlaǵanbyz.
