Qazaqstanda 1 mln adam nesıeni qaıtara almaı júr

ASTANA. QazAqparat - Qazaqstanda halyqtyń nesıelik mádenıeti tómen deńgeıde qalyp otyr. Bul týraly búgin QR Parlamenti Májilisiniń «Kollektorlyq qyzmet týraly» zań jobasy boıynsha jumys tobynyń otyrysynan keıin tilshilerge bergen suhbatynda QR Ulttyq banki tóraǵasynyń orynbasary Oleg Smolıakov málim etti.

«Bizde shamamen 5 mıllıon jeke tulǵada bank nesıeleri bar. Olardyń 1 mıllıonynda bereshek 90 kúnnen asyp ketken. Bankterdiń ssýdalyq porfeliniń 20 paıyzy jeke tulǵalarǵa tıesili. Bul negizinen ıpoteka men tutynýshylyq nesıeler», - deıdi O.Smolıakov.

Onyń sózine qaraǵanda, jeke tulǵalarǵa berilgen nesıelerdiń 85 paıyzy eshqandaı kepildikpen qamtamasyz etilmegen. Kepildiktiń bolmaýy qaryzdy talap etýdiń qıyndyǵyna baılanysty. Onyń ústine, bankterden nesıe alýǵa kelgen qaryz alýshylardyń 64 paıyzy óziniń turǵylyqty jeri men qarjylyq qabiletteri týraly aqparatty jasyrady. O.Smolıakovtiń pikirinshe, bul halyqtyń nesıelik mádenıeti tómen deńgeıde qalyp otyrǵandyǵyn bildiredi.

Aıta keteıik, qazir Parlament Májilisinde Ulttyq bank ókilderiniń qatysýymen «kollektorlyq qyzmet» týraly zań jobasy talqylanýda.