Qazaqstanda 1 maýsymnan bastap «Skýter» aktsııasy bastaldy
ASTANA. QazAqparat - Qazaqstanda 1 maýsymnan bastap «Skýter» aktsııasy bastaldy. Bul shara Kóliktik baqylaý komıtetiniń júzege asyryp jatqan flottaǵy apattylyqtyń aldyn alý jospary aıasynda ótkiziledi, dep habarlady QR Kólik jáne kommýnıkatsııa qyzmetiniń baspasóz qyzmeti.
«Ol joǵary jyldamdyqty, serýendik, sporttyq jáne basqa da shaǵyn kólemdi kemelerdi jurtshylyqtyń jappaı demalý oryndarynda qaýipsiz paıdalanýyn qamtamasyz etýge baǵyttalǵan», - delingen habarlamada.
Atalǵan shara elimizde jylda ótkizilip, sýǵa shomylý maýsymy boıyna sozylady. Aktsııa kezinde kóliktik baqylaý ınspetsııasynyń mamandary sý qoımalary aýmaqtarynda adamdar demalatyn oryndarda keme ıeleriniń qajetti keme qujattary men qutqarý quraldary bolýyn tekserýge arnalǵan reıdter júrgizedi.
Qazirgi kezde elimizde tirkelgen shaǵyn kólemdi kemelerdiń sany - 28 555. Olardy paıdalaný barysyndaǵy negizgi buzýshylyqtar qatarynda keme ıeleriniń kemelerdi qaýipsiz qoldaný talaptaryn saqtamaýy, belgilengen tártip boıynsha tirkelmegen jáne tehnıkalyq kýálandyrýdan ótpegen kemelerdi qoldanýy kezdesedi.
