Qazaqstanda 1 qyrkúıekte 270 myńnan astam bala mektep tabaldyryǵyn alǵash attaıdy
ASTANA. QazAqparat - Qazaqstanda 1 qyrkúıekte birinshi synypqa 270 myńnan astam búldirshin barady. Bul týraly «QazAqparat» HAA-nyń resmı saýalyna Bilim jáne ǵylym mınıstrliginen jaýap berdi.
«Aldyn ala málimetter boıynsha 2014-2015 oqý jylynda kúndizgi jalpy bilim beretin mektepterdegi oqýshylar 2 mln. 498 myń 819-dy qurady. Onyń ishinde 277 myń 575-i birinshi synyp oqýshylary», - delingen vedomstvo málimetinde.
Mınıstrliktiń habarlaýynsha, mektep formasyn kıetin oqýshylardyń sany artyp keledi. Máselen, 2012-2013 oqý jylynda atalǵan kıim úlgisin 4,5 myń mektepte 1,6 mln. bala (61 paıyzy) kıse, 2013-2014 oqý jylynda 5,4 myń mektepte olardyń sany 1,8 mıllıonǵa (72 paıyzy) jetti.
Oqýlyqtarmen qamtamasyz etý máselesine toqtalsaq, mınıstrlik bekitken tizim negizinde mektep kitaptaryn 20 qazaqstandyq baspa shyǵarady. «Atap aıtqanda, tapsyrysqa sáıkes basylyp shyǵarylatyn oqýlyqtardyń quny bekitilgen baǵamen satylady, ıaǵnı olar 300-700 teńge aralyǵynda bolady», - dep túsindirdi mınıstrlik ókilderi.
