Qazaqstanda 1 qyrkúıekten bastap «DosbolLIKE» antıbýllıngtik baǵdarlamasy iske qosylady

ASTANA. KAZINFORM - Jańa oqý jylynan bastap Qazaqstanda alǵash ret barlyq mektepter men kolledjderde balalar men jasóspirimder arasyndaǵy býllıng oqıǵalaryn azaıtýǵa, bilim berý uıymdarynda qaýipsiz, qoldaýshy jáne ózara qurmetke negizdelgen orta qalyptastyrýǵa baǵyttalǵan otandyq «DosbolLIKE» profılaktıkalyq baǵdarlamasy engiziledi, dep habarlaıdy QR Oqý-aǵartý mınıstrliginiń baspasóz qyzmeti.

Baǵdarlama balalardyń ál-aýqaty ındeksiniń qaǵıdattary men halyqaralyq jáne otandyq normatıvtik-quqyqtyq aktilerge sáıkes ázirlengen jáne býllıngke qarsy kúrestegi úzdik halyqaralyq tájirıbelerge súıenedi.

Baǵdarlamanyń aprobatsııasy elimizdiń 9 óńirindegi 50 mektepte júrgizilip, býllıngtiń aldyn alý júıeleri quryldy. Aprobatsııa nátıjesinde eń tıimdi tájirıbeler Astana, Almaty qalalary men Abaı, Jambyl oblystarynyń mektepterinde baıqaldy.

Atalǵan mektepterde shaǵym → taldaý → kómek jospary → qadaǵalaý úlgisi sátti qoldanyldy. Bul protseste arnaıy antıbýllıngtik toptar men keıingi baqylaý sharalary iske qosyldy.

«Biz «DosbolLIKE» baǵdarlamasyn býllıngtiń aldyn alýdaǵy turaqty qural retinde qarastyramyz. Aprobatsııa nátıjeleri kórsetkendeı, muǵalimder, ata-analar men balalardyń birlesken qatysý janjaldasý deńgeıin tómendetip, senim men syılastyq mádenıetin qalyptastyrady jáne mektep ortasyn anaǵurlym qaýipsiz ári qolaıly etedi», — dep atap ótti QR Oqý-aǵartý mınıstrligi Balalardyń quqyqtaryn qorǵaý komıtetiniń tóraǵasy Nasymjan Ospanova.

Baǵdarlama aıasynda mamandardy aýqymdy daıarlaý kózdelgen. Qazirdiń ózinde 2,5 myńnan astam pedagog, psıholog jáne bilim berý júıesiniń qyzmetkerleri oqytyldy. Jyl sońyna deıin bul kórsetkishti 8 myńnan astam mamanǵa jetkizý josparlanyp otyr.

Osyǵan deıin elimizdiń 9 óńirinde mektepte býllıngtiń aldyn alýǵa jáne ony azaıtýǵa baǵyttalǵan otandyq «DosbolLIKE» baǵdarlamasynyń aprobatsııasy sátti aıaqtalǵany týraly jazdyq.